Akademiku Artan Trebicka e ka cilësuar të gabuar nismën e Qeverisë, për futjen e fesë në shkolla.
“U trondita kur e dëgjova, sepse po të njëjtët njerëz para disa vitesh kur ishin në opozitë e kishin kundërshtuar këtë gjë dhe u trondita dhe se në këndvështrimin tim e quaj të gabuar që në shkollë të futet mësim feje dhe që ne jemi shtet laik, që feja është e ndarë dhe shkollat shtetërore në bazë të Kushtetutës janë të ndara nga feja”, tha sot Trebicka në Top Story.
“Nuk i takon një qeverie që të bëjë ndryshime të tilla që ka pasoja shumë afatgjata. Argumenti që nxori kryeministri nuk qëndron. Nuk më duket që terrorizmi në Shqipëri është problem dhe së dyti edhe nëse do të ishte, nuk ishte për arsyen se nuk bëhet feja në shkolla”, shtoi ai.
Ndërsa, historiani Pëllumb Xhufi tha se “feja dhe besimi fetar nuk është kërkesë e domosdoshme”.
Projekti për futjen e fesë në shkolla, u bë publik disa javë më parë nga kryeministri Edi Rama.
