Deputetja socialiste, Mimoza Hafizi është takuar sot me dy eurodeputetët Knut Fleckenstein dhe Hannes Swoboda të cilët ndodhen në Tiranë për të parë situatën, sidomos brenda PS-së. Pas këtij takimi, Hafizi tha se iu ka kërkuar 2 eurodeputetëve të ushtrojnë presion që PS të hap kutitë e referendumit.
“Një grup përfaqësuesish të forumit evropian kanë ardhur në Shqipëri për të parë si është situata sidomos në partitë e majta. Isha e ftuar si përfaqësuese e përpjekjes mbi atë që po bëjmë që e kemi quajtur “Shqipërinë mbi partinë”. Shpjegova me detaj çfarë ka ndodhur nga marrja e pushtetit në 2013 dhe sidomos çfarë po ndodh brenda Partisë Socialiste. Iu kërkova të ushtrojnë presion që PS të hapë kutitë e referendumit. Iu shpjegova përpjekjen tonë për të bërë transparent të quajturin referendum në PS. Përgjigjja ka qenë më e bukura e mundshme: Mos u dorëzoni, që do të thotë vazhdoni betejën”, ka deklaruar Hafizi.
Ajo shtoi se biseda me 2 eurodeputetët ka qenë një bisedë shumë dashamirëse nga e cila ka nxjerr konkluzionet që miqtë europianë e vlerësojnë përpjekjen për demokraci në partitë politike.
E pyetur nëse do vazhdojë përpjekjet e saj, Hafizi tha se është më e vendosur se kurrë.
