Dy pretendentët presidencialë, demokratja Hillary Clinton dhe republikani Donald Trump, janë në Nju Jork për zgjedhjet e sotme paraprake në këtë shtet. Clinton dhe Trump janë favoritët për të fituar në Nju Jork dhe këto fitore pritet të jenë një nxitje e madhe për fushatat e tyre.
Për republikanin Donald Trump, një fitore e madhe në shtetin e tij do të ishte një hap i madh drejt sigurimit të emërimit:
“Të martën, duhet të dilni të votoni. Duhet të merrni edhe miqtë tuaj pasi kemi të bëjmë me një lëvizje. Një lëvizje që ky vend nuk e ka parë asnjëherë.”
Trump kërkon të mëkëmbet nga humbjet e fundit ndaj rivalit Ted Cruz, shkruan VOA.
Cruz argumenton se imazhi negativ i Trumpit në sytë e shumë votuesve, do të çojë në mposhtjen e republikanëve në zgjedhjet e nëntorit nëse ai është kandidati republikan:
“Në mbarë vendin rreth 70 përqind e republikanëve pranojnë se nëse Donald Trump merr emërimin, Hillary Clinton do të fitojë. Hillary e mposht Donald Trumpin me mbi 10 përqind. Në se unë jam kandidati, ne e mposhtim Hillaryn.”
Por guvernatori i Ohajos John Kasich thotë se ai është kandidati më i mirë për të mposhtur Clintonin dhe shpreson të fitojë disa delegate në Nju Jork me një mesazh optimist.
“Rrezikojmë të humbasim çdo gjë që nga Shtëpia e Bardhë e deri tek organet legjislative të shteteve nëse nuk përcjellim një mesazh bashkues, frymëzues dhe pozitiv për vendin. Kjo është ajo që duhet të bëjmë!”
Në garën demokrate, ish sekretarja e Shtetit dhe senatorja e Nju Jorkut Hillary Clinton po kërkon të shfrytëzojë avantazhin e shtetit të saj.
“Në se votoni për mua, unë do të luftoj për ju gjatë kësaj fushate, do të luftoj për ju çdo ditë në Shtëpinë e Bardhë. Ju faleminderit dhe zoti e bekoftë Staten Island!”
Rivali Bernie Sanders u shkëput nga fushata për të folur në një konferencë të Vatikanit të premten për pabarazinë ekonomike, një temë thelbësore e fushatës së tij:
“Besoj me gjithë zemër se jam kandidati më i fuqishëm për t’u përballur me republikanët dhe mendoj se gjithnjë e më shumë demokratë e kuptojnë këtë.”
Por nëse Sanders humbet në Nju Jork ai do të vazhdojë të ketë një ndikim të madh në garën e demokratëve, thotë Michael Williams.
“Sanders është i ndershëm në ekstrem. Ai është çuditërisht tërheqës me pamjen e tij të shkujdesur. A do të fitojë? Jo. Por a e ka ndikuar ai këtë garë dhe kursin e partisë demokrate në aspektin afatgjatë? Sigurisht.”
Fitoret në Nju Jork për Clintonin dhe Trumpin do të forconin pozitat e tyre si kryesues të garës.
