Superiorja ka hyrë në fazën më interesante, pas javës së 30-të të saj. Humbja e papritur e Skënderbeut në shtëpi me pukjanët dhe fitorja e Partizanit ndaj kuqebluve e ka ngushtuar distancën mes dy kryesuesve në vetëm 2 pikë. Pra, beteja për titullin është rihapur plotësisht, kur kanë mbetur për t’u luajtur edhe 6 ndeshje nga kampionati. Edhe sa i takon zonës europiane, rivaliteti është i madh, gjithçka e hapur.
Kukësi, Teuta dhe Tirana mëtojnë vendin e tretë, që të dërgon në Europë, por duke bërë kombinime edhe me fituesin e Kupës së Shqipërisë, po ia bëjnë “hyzmetin” edhe vendit të katërt. Partizani ka nisur përgatitjet për transfertën kuksiane Tërbuni pret të zyrtarizohet edhe matematikisht, si skuadra e rënë një kategori më poshtë, ndërsa në zonën e mbijetesës janë të përfshirë që nga Laçi, Vllaznia, Flamurtari dhe Bylis. Sikurse shihet, Superiorja është “ndezur flakë” dhe sfidat në vazhdim premtojnë antagonizëm pa fund. Partizani, që po kalon një javë tejet të gëzuar, pasi ka rikuperuar jo pak në hendekun që kishte me korçarët, vijon përgatitjet me intensitet për transfertën e radhës. Kalendari e dërgon në “Zeqir Ymeri”, të hënën e javës që vjen, në orën 16:00.
Kukësi do të luajë nesër gjysmëfinalen e kthimit të Kupës së Shqipërisë, ndaj Flamurtarit, duke pasur epërsinë 2-0 të gjysmëfinales së parë. Lojtarët e Partizanit duke iu gëzuar fitores ndaj kuqebluve Sidoqoftë, verilindorët do të shpenzojnë jo pak energji, ndërsa të kuqtë janë në stërvitje, ndaj edhe ballafaqimi është shtyrë për të hënën. Në faqen e klubit 15 herë kampion të vendit është lëshuar edhe kushtrimi, apo motoja, me të cilin duhet të stërviten e përgatiten lojtarët e kuq në vazhdim. “Pa eufori, me plot besim. 6 ndeshje, 6 finale,” – thuhet në faqen e Facebook-ut të Partizanit, ku nuk mungon edhe një falënderim për tifozët, të cilët e kryen më së miri rolin e të ashtuquajturit “lojtari i 12-të” ndaj Vllaznisë: “Në emër të FK Partizanit duam t’u shprehim falenderime, por nuk arrijmë t’i gjejmë fjalët se si ta shpalosim gjithë atë mirënjohje për punën dhe tifon që bëtë në ndeshjen ndaj Vllaznisë. Së bashku na presin edhe 6 ndeshje finale, së bashku s’na ndal dot askush!”
