Një përfaqësi e banorëve të cilët u preken nga projekti për zgjerimin e rrugës Transballkanike kanë protestuar para zyrës së kryeministrit Rama në Vlorë, ku edhe kanë kërkuar takim.
Me pankarta në duar i kanë bërë thirrje Kryeministrit dhe pushtetit vendor të trajtojnë me përparësi çështjen e shpronësimeve të banesave, që sipas tyre nuk është në bazë të çmimit të tregut.
“Asnjë nuk na jep asnjë përgjigje, kemi ardhur këtu tek zyra e Edi Ramës se këta thonë të gjitha i ka Edi Rama. Nëse i ka Edi Rama ai duhet të na presë se jemi qytetarë të vjetër të Vlorës. Nëse Edi Rama në Vlorë, në një fshat më të humbur të Shqipërisë ka shtëpi me 200 euro dhe me tokë 50 euro, unë i propozoj Edi Ramës të më japë shtëpinë e tij dhe i jap 300 euro.”- shprehet një banor.
“Duam të drejtën tonë të pronës, të shtëpisë që po na hedh në rrugë Edi Rama, e kemi zgjedhur. Le të rregullohet Vlora, por mua të më japin vlerën që më takon. Ku të përplasem unë, të vras veten time?”- thotë një tjetër.
Banorët që preken nga projekti i zgjerimit të bulevardit të Transballkanikes i kanë bërë thirrje kryeministrit Edi Rama të zgjidhë çështjen e tyre, në të kundërt paralajmërojnë përshkallëzim të protestave.
