Një 60-vjeçar ka humbur jetën sot në Korçë, por për familjarët ai mund të ishte ende gjallë nëse ambulanca do kishte ardhur në kohë. 60-vjeçari Rexhep Zerolli ishte në një lokal kur pësoi infarkt por familjarët hedhin akuza të rënda ndaj mjekëve se nuk iu përgjigjën thirrjes për ndihmë për të shpëtuar të afërmin.
Madje sipas tyre trupi qëndroi i ngrohtë për shumë kohë dhe ambulanca erdhi 40 minuta me vonesë. Familjarët akuzojnë bluzat e bardha për neglizhencë. Ata deklarojnë se do të bëjnë dhe denoncim në polici. Të detyruar nga mungesa e ambulancës familjarët e kanë transportuar të afërmin e tyre me makinë private dhe të mbuluar me çarçafë në spital në prani të dhjetëra qytetarëve.
“Ambulanca erdhi 40 minuta me vonesë. Vdekja, nga neglizhenca e bluzave të bardha. Mjekët nuk dhanë asnjë ndihmë ndaj të afërmit tonë. Nëse do kishte ardhur në kohë ai do ishte ende gjallë”, ka deklaruar kunati Andrea Sholla. /BalkanWeb/
