Gjykata e Tiranës ka dënuar dy inspektorë tatimorë, të cilët akuzohet për korrupsion. Leonard Dedej dhe Saimir Latifi do të qëndrojnë në qeli për 16 muaj. Sipas vendimit të gjykatës që disponon Bold News, ata u merrnin ryshfet shoferëve kosovarë të kamionëve.
Çështja penal ka nisur më 1 prill të vitit të kaluar. Mentor Aliu është shofer i kompanisë “Nderimi” me qendër në Ferizaj, Kosovë, dhe drejtonte një automjet kamion trajler, me të cilin transporton materiale të ndryshme si hekur, skrap etj. Ai ishte ngarkuar me hekur nga Elbasani dhe ka lëvizur nga rruga e Durrësit për në Kosovë. Rreth orës 12.30, kur ka qenë në Vorë, tek bashkimi i rrugës së vjetër me autostradën, i kanë bërë shenjë me tabelë tre punonjës, që ishin me uniformë ngjyrë gri dhe jelekë të verdhë, të cilët në dijeninë e tij janë punonjës tatimorë.
I është bindur urdhrit, dhe ka ndaluar në anë të rrugës. Aty i janë afruar punonjësit, të cilët nuk i janë prezantuar, por i kanë kërkuar dokumentet e mallit. Pavarësisht se Mentori ua ka dorëzuar dokumentet e kërkuara, punonjësit i kanë thënë se do t’i vendosnin një gjobë prej 500 euro. Kallëzuesi i ka kërkuar arsyen e vendosjes së kësaj gjobe, por një nga punonjësit i thotë që, të shkonte dhe të linte 100 euro në bagazhin e makinës së tyre që ishte parkuar 10 metra më larg dhe nuk do ia vendosnin gjobën. Kallëzuesi u ka thënë se nuk kishte 100 euro për t’u dhënë, por ata kanë këmbëngulur prapë duke i thënë që t’u japë të paktën 50 euro. Më pas ka shkuar tek kabina e kamionit, ka marrë portofolin e ka hapur dhe ia ka treguar punonjësve, duke u thënë se nuk mundej pasi me vete kishte vetëm 45 euro.
Njëri nga punonjësit ka zgjatur dorën dhe ia ka marrë 45 euro, që kishte në portofol. Kallëzuesi u ka kërkuar që t’i lëshojnë ndonjë shënim, që të justifikohej tek pronari për pagesën. Kanë rënë dakord dhe njëri nga punonjësit i ka dhënë një copë letër në të cilën ka shkruar vetë emrin e mbiemrin e kallëzuesit dhe shumën 45 euro e dhënë si për certifikatë. Kjo fletë është nënshkruar nga vetë punonjësi. Në vendim thuhet se pas kësaj, kallëzuesi ka bëre dy herë përpjekje për të lajmëruar policinë por nuk ka qenë e mundur të lidhej. Në këto momente tek kamioni është afruar njëri nga punonjësit e shfrytëzimit rrugor, i cili i ka folur ashpër duke i thënë se “a donte t’ia kthente eurot e t’i vinte gjobën jo 500 por 1000 euro?”.
Kallëzuesi është larguar dhe gjatë rrugës ka telefonuar numrin 129 për të njoftuar policinë. Kur ka qenë në zonën e Rrëshenit, nga policia i është thënë që të njoftoj kur të mbërrij në Pikën e Kufirit Morinë. Kur ka shkuar në Morinë, ai është paraqitur tek stacioni i policisë duke kallëzuar për çfarë i ka ndodhur. Atij i është sekuestruar edhe fleta që plotësoi dhe nënshkroi një nga punonjësit, në të cilën shkruhet “Mentor Alia pagoi 45. E. Për certifikata AA256BO 01.04.2015 ora 12.30”. E në fund edhe nënshkrimi i tij.
Hetuesit kanë bërë kryerjen e ekspertimit teknik grafik të shënimit të kryer. Në konkluzion të aktit të ekspertimit grafik, është përcaktuar se shkrimet në letrën objekt ekspertimi janë të njërit prej punonjësve, të pandehurit, Leonard Dedej. Ky i fundit ka pranuar akuzën, ndërsa dy të tjerët e kanë mohuar. Dedej ka shprehur pendim për sa ka kryer dhe në të njëjtën kohë ka dhënë edhe identitetin e të pandehurit tjetër që ka qenë afër tij dhe në komunikim me Mentor Aliu gjatë marrjes së lekëve. Të pandehurit i kanë thënë kallëzuesit ndër të tjera “…merri eurot, e shko tek makina jonë e cila është 10 metra më tej, e na i lër vetë aty (eurot)!…”.
