Dy qytetarë turq janë vënë në pranga në aeroportin e Rinasit pasi ishin duke udhëtuar me dokumente të falsifikuara. Burime zyrtare nga policia thanë se të arrestuarit janë, Recep Cahit Dogan, 65 vjeç, lindur dhe banues në Turqi Stamboll, si dhe e turkja Ozden Gur, 33 vjeçe, lindur dhe banuese në Turqi Stamboll.
Lexoni historinë e tyre:
Këta shtetas kanë mbërritur në aeroportin e Rinasit me linjën e fluturimit Turqi -Tiranë dhe në vijim janë paraqitur për regjistrim në kabinat e hyrjes në Republikën e Shqipërisë.
Gjatë procesit të regjistrimit nga ana e kontrollorëve është dyshuar në lidhje me pasaportën e shtetases turke Ozden Gur e cila ka paraqitur për dokument udhëtimi një pasaportë turke e lëshuar në emër të Y. Y. 33 vjeçe.
Ky dokument është dërguar për ekzaminim në Laboratorin e Rinasit ku ka rezultuar si dokument me faqen e gjeneraliteteve të falsifikuara. Në vijim të dy këta janë shoqëruar për në Komisariatin e Rinasit.
Gjatë veprimeve të para hetimore, turkja Ozden Gur ka deklaruar se me Recep Cahit Dogan me të cilin ka udhëtuar nga Stambolli për në Rinas kanë lidhje shoqërore dhe miqësore. Kjo deklaron se me këtë pasaportë që ka dijeni se është e falsifikuar, është pajisur në qytetin e Stambollit te një tjetër grua turke të cilën e identifikon vetëm me emrin S., dhe shprehet se e ka njohur kur ka vuajtur vetë dënimin me burg në vitin 2010 për “Vjedhje” dhe “Plagosje” dhe këtë dokument deklaron se e ka blerë për shumën prej 3000 dollarë amerikan.
Turku Recep Cahit Dogan deklaron se e ka ndihmuar shtetasen Ozden Gur për të udhëtuar në drejtim të Shqipërisë dhe se kostot e udhëtimit të kësaj shtetaseje dhe të vetat, si dhe pagesën e qerasë së banesës në Tiranë ku do qëndronte Ozden Gur do i mbulonte vetë Recepi.
Gjithashtu Recepi deklaron se kur e ka bllokuar policia në Rinas turken Ozden Gur, i ka deklaruar shërbimeve të policisë në Rinas se ajo ishte asistentja e tij.
Për shtetasin Turk Recep Cahit Dogan u mor masa e arrestit në flagrancë për veprën penale “ Ndihma për kalim të paligjshëm të kufirit“, parashikuar nga neni 298 i Kodit Penal.
Për shtetasen Turke të identifikuar si Ozden Gur u mor masa e arrestit në flagrancë për veprën penale të parashikuar nga neni 189 i Kodit Penal “falsifikimi i pasaportave, vizave apo letërnjoftimeve”. Materialet i kaluan Prokurorisë për veprime të mëtejshme.
