Ish kryeministri, Sali Berisha, ka denoncuar një kërcënim jete që i është bërë akademikut Mynyr Koni, kandidat për rektorin e Universitetit të Tiranës.
Ky i fundit është kërcënuar nga Emiljano Shullazi, të cilin e drejton kryeministri, Edi Rama, sipas Berishës. Berisha ka thirrur mediat në zyrën e tij për t’i bërë thirrje prokurorisë së Tiranës të nis hetimet lidhur me ngjarjen që sipas tij nuk është dëgjuar ndonjëherë.
“Rama zgjedhjet në universitetet e Tiranës ka ngarkuar Emiljano Shullazin për të përcaktuar se kush duhet të jetë rektor i universitetit të Tiranës, në zbatim të porosive të tij, Shullazi të enjten, ndalon njërin nga kandidatët, nuk e di se sa janë, akademikun Mynir Koni, është në shkencat e natyrës, por nuk e di se cila është fusha e tij, siguroj shqiptarët që në memorien time, ky person nuk ka asnjë lidhje me PD dhe kryebanditi Shullazi i kërkon profesorit të tërhiqet nga gara ose do i rrëmbehet djali dhe i thotë se po fole ke kokën, dje profesori i nderuar ka paraqitur në mënyrë të papritur dorëheqjen. Po dje banda e Shullazit me tre makina të blinduara, sot në vend qarkullon me të vetëm Edvin dhe Emil Shullazi, rektorin aktual Dhori Kulen, dhe i kanë kërkuar me kërcënim që të heq cdo mbështetje Konit, nuk e di nëse i kanë kërkuar apo jo më shumë se kaq” tha Berisha.
Ai ka ftuar presidentin të informohet për këtë dhe të angazhohet sipas ligjit, ndërkohë prokurorit të Përgjithshëm, të angazhojë prokurorinë e Tiranës. Sipas Berishës, bandën e Shullazit e lëviz vetëm Edi Rama, duke i dhënë ultimatum kryeministrit të frenohet, pasi do të përgjigjet.
