Kryebashkiaku i Tiranës, Erion Veliaj ka treguar sot edhe një anë tjetër të karakterit të tij, ndoshta një pasion i tij i pazbuluar, mjekësia. Ndërsa inauguroi hapjen e rrugës dhe korsisë së biçikletave në krah të Pallatit të Kongreseve, Veliaj ftoi edhe njëherë kryeqytetasit të shfrytëzojnë këtë si një mundësi të jashtëzakonshme për shëndetin e mirë.
Pasi ka bërë një xhiro me biçikletë në rrugën e sapoçelur, shoqëruar nga përfaqësues të ambasadës holandeze, Veliaj e cilësoi këtë një investim të dyanshëm, në infrastrukturë dhe në kulturë.
“Nuk jemi mësuar shumë me biçikletat. Dua të theksoj se ka dy lloj investimesh, në infrastrukturë dhe në kulturë, janë të dyja njësoj të rëndësishme. Çdo transformim vjen me një sakrificë, për të gjithë. Ne kemi shumë shumë njerëz e të rinj obezë, tashmë ka shërim, jo ilaçi, jo spitali, quhet biçikleta” tha Veliaj.
Ai njoftoi se nga data 10 qershor deri 10 korrik, sheshi kryesor do t’i dedikohet vetëm këmbësoreve. “Do të kemi festë të madhe për kampionatin evropian të futbollit, do i gëzohemi ndeshjeve të Kombëtares në Francë dhe do të japim mesazhin se qyteti është për njerëzit”, tha ai.
