Kur vjen puna tek bota dixhitale dhe teknologjike, e cila duket se është kryefjala në ditët e sotme dhe na rrethon gjithandej, diploma duket se nuk ka aq shumë peshë në disa profesione të caktuara me të cilat ne do ju njohim më poshtë:
1. Internet Marketing
Nevoja për Internet Marketing nuk ka qenë kurrë më e madhe sesa sot. Bizneset në të gjithë botën kanë nevojë për njerëz të aftë për ti mundësuar të gjenerojnë më shumë të ardhura nëpërmjet internetit ose thjesht për të tërhequr vëmendjen e mijëra vetave që mund të jenë klientët e tyre potencial.
Shumë koncepte Internet Marketingu janë shumë të thjeshta për tu mësuar dhe nuk kërkojnë më shumë se 2 javë, por ama impakti që krijojnë tek një biznes i vogël është shumë i madh dhe si rrjedhojë këto aftësi janë shumë të kërkuara dhe mbi të gjitha shumë të paguara.
2. Programues
Në fakt në ditët e sotme ka me qindra lloje programimi. Ka programim për IOS, Android, Inxhinieri Softwerash, Web Development, UX/UI etj. Gjuhët e programimit janë me shumicë, por të gjitha kanë një të përbashkët: janë super të kërkuara. Nëse doni të investoni në një profesion që ka karierë të sigurtë, programimi është investim i sigurtë për ju.
3. Web Designer
Të qënit grafist shpesh herë kërkon edhe një sens të mirë artistik, por mënjanë talentit tuaj si artist, të mësosh bazat e programeve më të njohura si Adobe Photoshop dhe Illustrator dhe për tu bërë një grafist i mirë, nuk do dhe aq shumë kohë.
Me rritjen e penetrimit të internetit, gjithnjë e më shumë biznese dhe individë po kërkojnë për grafista Web-i të talentuar.
4. Menaxher Media Sociale
Ndryshe nga Internet Marketing, menaxhimi i rrjeteve sociale është kryesisht një punë menaxheriale dhe jo domosdoshmërisht marketing.
Nëse jeni duke përdorur Facebook dhe Instagram në këto momente, shanset janë që jeni mjaftueshëm të kualifikuar për të menaxhuar rrjetet sociale për një biznes çfarëdo.
Menaxhimi i rrjeteve sociale konsiston në publikimin e vazhdueshëm të informacioneve dhe të rejave në lidhje me biznesin përkatës dhe ndjekjen e ndërveprimit me klientët. Kjo punë shpesh herë kërkon kohë, gjë që menaxherët e bizneseve nuk e kanë në dispozicion dhe këtu hyn në fuqi aftësia juaj për të menaxhuar rrjetet sociale.
5. Menaxher Shitjesh
Është e thjeshtë të nënvlerësosh një profesion të tillë, pasi shumë prej nesh kanë mendime negative me shitjen, por është një pozicion shumë i rëndësishëm.
Nëse ju pëlqen të komunikoni me njërëzit dhe e shihni veten të qënit të natyrshëm kjo mund të jetë një rrugë e mirë për ju. Nëse produkti apo shërbimi i jep vlerë të vërtetë një individi apo biznesi, nuk ke nevojë të shesësh por thjesht të influencosh.
Mos e nënvlerësoni këtë fushë pasi është shumë e rëndësisshme dhe mund t’ju çojë përpara nëse zgjidhni partnerët e duhur (biznese inovative që duan të ofrojnë sa më shumë vlerë për klientin).
