Tifozëve të Partizanit u ka humbur durimi. Zhgënjimet nga skuadra e tyre e zemrës janë të shumta, si barazimi i djeshëm në Vlorë. Humbja e mundësisë së artë, që erdhi si një “asist” nga Kukësi, për ta ngushtuar diferencën nga Skënderbeu në 3 pikë, nuk kapërdihet kollaj nga mbështetësit e kuq.
Ata bëjnë fajtor trajnerin Agostineli, që nuk po i rregullon pikat e dobëta, sikurse është pësimi i golit “in extremis” në ndeshjen e tretë me të në krye, apo edhe lojtarët, që nuk e justifikojnë fanellën që mbajnë veshur. Në faqen zyrtare të Partizanit në Facebook, tifozët e kuq e kanë shprehur indinjatën e tyre përmes komenteve të shumta.
Ne po botojmë disa prej tyre, për të treguar se cila është atmosfera tek i ashtuquajturi “lojtari i 12-të” i Partizanit. Helidon Tahiraj: “Shisni këto ndeshje që kanë mbetur e bëni ndonjë lekë për kompleksin, se nuk fitohet kampionati me disa lojtarë, të cilët janë për Kategorinë e Dytë”. Agim Tutulani: “Ore, ky Agostineli më dështak s’kam parë. I vetmi trajner që luan për 1-0 dhe gjithmonë ha gol në fund, për 1-1. S’ka bërë njëherë 2-0. Të iki sa më parë, se është dështim total. E ka shpërfytyruar ekipin nga Starova, totalisht”.
Joner Nikolla: “O gjeniu ynë i madh, 6 barazime dhe 5 fitore, ku janë kritikët e Starovës, që ankoheshin se ai luante lojë mbrojtëse. Agostineli largohu, pa qenë i urryer me shpirt nga tifozëria jonë!” Astrit Oruci: “Ky Agostineli të ikë nga ka ardhur, se është një dështim total. Jo projekte afatgjata nuk mund të ndërtojë dhe zbatojë ai te Partizani, por niveli i tij si trajner lë shumë për të dëshiruar. Ky është trajner i barazimeve, Partizanit i duhet trajner fitoresh.” Aleksandër Suti: “Përfundimisht, ne nuk e meritojmë titullin kampion. Është e disata herë që na jepet mundësia për ta fituar, po nuk e shfrytëzuam. Starova ishte 1000 herë më mirë. Me kaq lekë sa paguhet ky Agostineli, t’ia kishin dhënë Starovës e kishte shpallur kampion. Nuk kemi pse të justifikohemi më”.
Rigers Delilaj: “Bravo, ne gjithmonë bëjmë një gol dhe pastaj heqim tërë sulmuesit dhe vëmë mbrojtës. Veç mbrohemi dhe pësojmë gola. Bravo, trajner injorant!” ÂûRêł Shima: “Jeni turpi i këtij emri të madh dhe kësaj supertifozërie. Nuk e meritoni as fanellën, as këta tifozë. Vetëm dengla keni, bashke me atë dështakun e Italisë.” Kukaj Angjelin: “Unë e ndjek nga Greqia kampionatin shqiptar, por pëfundimishte kam kuptuar se Partizani nuk e do kampionatin. Sa herë Skënderbeu ka humbur pikë, të njëjtën gjë ka bërë edhe Partizani. Nuk e di çfarë të themi, tani futbolli është bërë vetëm lekë.”/ Telesport
