Ka filluar votimi i referendumit për të vendosur mbi mandatin e kryetarit të Partisë Socialiste.
Priten të votojnë rreth 81.000 votues në 383 qëndra votimi. Kryeministri Rama do të votojë në orën 10.00 në zonën e Freskut. Ndërkohë, mësohet se Ben Blushi ka bërë thirrje për të mos votuar në këtë referendum. Referendumi është i pari që votohet nga një forcë politike në vend. Referendumi i thirrur në Kongresin e datës 19 mars do të vendosë nëse mandati i kryetarit rinovohet automatikisht pasi ai fiton zgjedhjet dhe bëhet kryeministër.
Socialistët janë ndarë në dy grupe.
Të drejtë vote në këtë referendum do të kenë të gjithë anëtarët e Partisë Socialiste të anëtarësuar deri më datë 31 dhjetor 2015. Ky vendim është marrë nga drejtuesit e PS-së për të shmangur
pretendimet e zërave kundër, se referendumi do të manipulohet me anëtarë të rinj të anëtarësuar në PS.
Rezultatet e të këtij referendumi priten të bëhen publike mesditën e së dielës.
Gjatë ditës së djeshme kryeministri Rama dhe pjesa më e madhe e ministrave dhe deputetëve bënë thirrje për një votim masiv, për të treguar vlera të mëdha demokracie brenda partisë.
Ndërsa Ben Blushi dhe Mimoza Hafizi e shohin jo legjitim referendumin dhe kanë bërë thirrje, ditën e djeshme, për vigjilencë pasi sipas tyre do të ketë trukim.
Në orën 16.00 do të përfundojë procesi i votimit.
