Podesta Group, kompania amerikane e lobimit, e cila aktualisht drejton fushatën e kandidates demokrate për Presidente të Shteteve të Bashkuara të Amerikës, Hilari Klinton, ndodhet në dokumentet e zbuluara të skandalit “Panama Papers”.
Podesta Group nuk i është emër i panjohur në vendin tonë. Ajo ka bashkëpunuar me Partinë Demokratike gjatë qeverisjes së tyre tetë vjeçare dhe sipas infomacioneve partia kryesore opozitare ka nënshkruar në mars të këtij një tjetër kontratë me kompaninë.
Sipas Washington Free Beacon dhe Observer, Podesta Group ka lidhur një kontratë me bankën më të madhe ruse“Sberbank”, e cila ka lidhje me Presidentin, Vladimir Putin.
Në fund të muajit mars, Podesta ra dakord që të lobonte për filialin amerikan të “Sberbank”, me qëllim përmirësimin e imazhit të saj dhe gjithashtu për të ulur sanksionet që kanë dëmtuar shumë fianacat ruse.
Drejtor Ekzekutiv i grupit është Tony Podesta, i cili e themeloi firmën në vitin 1987 me vëllain e tij John, ish-shef i kabinetit të presidentit Bill Clinton dhe ish-këshilltar i Presidentit Barak Obama.
Tony Podesta është menaxheri dhe lobuesi i fushatës presidenciale të ish-Sekretares së Shtetit Hilari Klinton, kurse John Podesta është kryetar i fushatës së saj për 2016.
Sipas raporteve, Podesta Group ka lidhje edhe me tre subjekte të tjera të lidhura me “Sberbank”: Troika Dialog Group Limited që ndodhet në Cayman Islands, SBGB Cyprus Limited që ndodhet nw Qipro dhe SB International me bazë në Luksenburg.
Të dyja Sberbank dhe Troika Dialog Group janë të lidhura me kompanitë e miqve të ngushtë të Presidentit rus Vladimir Putin për të zhvendosur fondet publike në investime private.
Kjo dhe shumë transaksione të ngjashme, janë karakterizuar nga gazetarët e “Panama Papers” si shembuj sesi kompanitë off-shore të njerëzve të afërt të Putin kishin të drejta të privilegjuar për të kontrolluar aksione të mëdha në ndërmarrjet strategjike ruse, ku blinin aksione me çmime qesharake.
Pyetja që ngrihet nga analistët dhe ekspertët është pse “Podesta Group” lidhi kontratë me “Sberbank”, kur dihet botërisht që kjo bankë, më e madhja në Rusi nuk operon në fshehtësi dhe se reputacioni i saj lë shumë për të dëshiruar.
Askush nuk u habit kur emri i saj ishte në megaskandalin e “Mossack Fonseca”.
