19 automjete luksoze janë sekuestruar nga policia në Shkodër. Operacioni i koduar “Lux” i bluve të Shkodrës ka sjellë ndalimin e 11 personave dhe sekuestrimin e 19 makinave të luksit që kishin hyrë ilegalisht në Shqipëri me vlerë qindra mijëra euro.
Mësohet se automjetet u futën nga pika kufitare e Hanit të Hotit në vitin 2015. Deri tani rezulton se mjetet janë vjedhur në vendet e rajonit e më pas janë trafikuar nëpërmjet Malit të Zi.
Prokurori i Shkodrës, Anton Martini tha se po hetohen edhe punonjës të pikës së kalimit të Hanit të Hotit, të cilët kanë favorizuar këtë aktivitet të paligjshëm.
