Mesditën e sotme, Presidenti Nishani ka pritur homologun e tij hungarez, i cili ndodhet në Shqipëri për një vizitë zyrtare.
Në një konferencë të përbashkët për shtyp, Nishani dhe presidenti Janos Ader, folën për marrëdhëniet e mira diplomatike mes dy vendeve dhe forcimin e tyre në disa fusha.
“Hungaria është një vend mik i Shqipërisë, – tha Nishani. – Ne kemi pasur dhe kemi marrëdhënie miqësore mes dy vendeve, duke krijuar marrëdhënie në interes të ndërsjellë. Shpreh mirënjohjen e thellë që Hungaria i ka dhënë Shqipërisë në procesin për integrimin evropian. Ne diskutuam për bashkëpunime dy paleshe dhe shumë paleshe, ku theksi u vu te forcimi i marrëdhënieve ekonomike dhe tregtare, shkencës dhe arsimit”.
Nishani shtoi “Hungaria është një avokate e Shqipërisë në rrugën drejt BE-së, duke dhënë një ndihmë të madhe pas ndryshimeve dhe reformave që janë bërë në vitet e fundit”.
Nga ana e tij, presidenti Ader, theksoi se “Hungaria mbështet integrimin e Shqipërisë në Bashkimin Europian. Ne diskutuan për shumë çështje me presidentin Nishani dhe ashtu siç e tha dhe ai, ne kemi qenë dhe do të jemi avokate e Shqipërisë në rrugën drejt BE-së”.
