“ Ishte e paktë në fjalë dhe kur pritëm që ajo të merrte sërish dhe ajo nuk telefonoi, ne i binim vetë numrit që ajo na kishte lënë, por asnjëherë pas asaj dite nuk ia dëgjuam zërin” rrëfen motra e Zyrasë, vajzës së vdekur që u gjet në Amsterdam 19 vite më parë.
Motra e Zyrasë, Xhuljeta tregon se nga frika e trafikantëve nuk mundën që të vazhdonin më tej kërkimet për motrën e tyre të zhdukur. Ajo jeton në një banesë të vogël në lagjen “11 Nëntori” të qytetit të Elbasanit, bashkë me vëllanë më të vogël, si edhe dy djemtë e Zyrasë, tashmë të rritur. Ka qenë një gjendje me të vërtetë shoku për ta kur kanë parë fotografinë e viktimës në televizor, e cila dukej e shtrirë, e pajetë.
Menjëherë pas kësaj, djemtë e viktimës, bashkë me motrën e saj, Xhuljetën, kanë shkuar dhe kanë identifikuar motrën dhe nënën e tyre nëpërmjet një fotoje ku edhe shfaqej trupi i pajetë i Zyrasë. Mes dhimbjes, ankthit, Xhuljeta, pasi ka identifikuar motrën e saj, rrëfen edhe për vuajtjet e saj që në moshë të vogël e deri në momentin që ajo u largua nga Shqipëria për të mos u kthyer më kurrë. Ajo tregon se biseda e fundit me motrën ishte në 10 mars të 1997. “Ajo mori edhe tri herë të tjera në telefon, dhe biseda e fundit që kemi pasur me të ka qenë data 10 mars e vitit 1997” thotë ajo. Sipas saj, motra tregonte se ishte mirë. “Ishte e paktë në fjalë dhe kur pritëm që ajo të merrte sërish dhe ajo nuk telefonoi, ne i binim vetë numrit që ajo na kishte lënë, por asnjëherë pas asaj dite nuk ia dëgjuam zërin” thotë ajo.
Zyra Hida do të festonte 50- vjetorin në 21 korrik të këtij viti, nëse do të ishte gjallë. Nëna e 3 fëmijëve të rritur tashmë u identifikua si viktima e gjetur pa jetë në një lagje të Amsterdamit, në Holandë, në vitin 1997.
