Deputeti i PS-së, Taulant Balla ka kërkuar procedim penal për deputetin e PD-së, Gent Strazimiri, pas publikimit të fotove dhe videos ky ai shfaqet me një armë në brez në protestën e sotme. Balla thotë se PD-ja duhej të distancohej nga ky rast por i ofron mburojë politike, shkelësit të ligjit.
“Pritëm për disa orë që Partia Demokratike të dënojë incidentin e rëndë dhe veprën penale të provuar tashmë të armëmbajtjes pa leje të deputetit të saj Gent Strazimiri. Por në vend që Partia Demokratike minimalisht të distancohet dhe të përjashtojë këtë shkelës të ligjit nga radhët e veta dhe të mbështesë policinë e shtetit dhe drejtësinë të bëjnë detyrën e tyre në këtë rast, po i ofrojnë mburojë politike. Madje Sekretari i Përgjithshëm i PD Arben Ristani me paturpësi ka shkuar deri aty sa ta quajë këtë incident të rëndë si një inskenim të mediave, megjithëse shkelësi i ligjit G.S. e pranoi vetë ketë vepër kriminale”, shprehet Balla.
Ai i konsideron veprimet e policisë korrekte dhe i kërkon PD-së të dëshmojë me vepra dhe jo fjalë respektin ndaj ligjit.
“Duke i konsideruar veprimet e deritanishme të Policisë së Shtetit si tepër korrekte, kërkojmë që sipas ligjit shtetasi G.S. të procedohet penalisht në kushtet e flagrancës të armëmbajtjes pa leje. Kujtoj që kjo vepër penale është një vepër e përfshirë në Ligjin për Dekriminalizimin. Është rasti që PD të dëshmojë me vepra dhe jo me fjalë respektin ndaj ligjit”, thotë Balla.
“Gjithashtu dënoj edhe dhunën e deputetëve dhe përfaqësuesve të tjerë të PD ndaj punonjësve të Policisë së Shtetit dhe të Policisë Bashkiake të Tiranës”, përfundon ai.
