Nazime Visha do t’i rikthehet jetës së saj pas 4 viteve burg, por ky do të jetë një fillim i ri për të, pas gjithë asaj që ka kaluar ndërsa ishte ende e mitur. I vetmi person i afërm që e pret atë para burgut është gjyshja e saj Drita, e cila e ka marrë vesh lajmin nga gazetarët dhe nuk di si të shprehë emocionet.
Ajo e ka bërë me vrap rrugën nga fusha e lagjes “Ali Demi” për të burgu i grave.
“Më treguan gazetarët që është falur Nazimja, nuk e dija. Unë sot kam një gëzim shumë të madh. E kam marrë që nga fusha poshtë deri këtu me vrap. Nuk kisha një njeri që të më shtrëngonte aq e gëzuar isha. Nazimja ishte minorene dhe ka vuajtur në burg. Falënderoj gjithë gazetarët, falënderoj Presidentin Bujar Nishani, falënderoj ministrin e drejtësisë Ylli Manjani. Përshëndes gjithë politikanët, janë të mrekullueshëm”, tha ajo.
Gjyshja tregon se fillimisht do ta mbajë ajo Nazimen dhe do të kërkojnë edhe punë.
“Prindërit e saj janë në fshat në Zallbastar. Do e marr unë. Nuk e di nëse do jetojë me mua. Do kërkojmë punë, shkollë. Ajo ka mësuar gjithë ato zanate, parukiere, rrobaqepëse, kuzhiniere, ka qenë e disiplinuar”, thotë gjyshja.
