Hektor Çiftja, tashmë anëtar i Asamblesë së PS-së, u bë më së shumti i njohur pas incidentit të ndodhur disa javë më parë me anëtarët e kësaj partie, ku njëzëri u lëshuan fishkëllima ndaj deputetit Blushi kur ishte duke folur në podium.
Menjëherë pas këtyre, Blushi përmendi emrin e Çiftes, i cili u akuzua madje së bashku me disa emra të tjerë se kanë dashur të pengojnë fjalimin e deputetit Blushi në Elbasan, ku dhe kërkoi zgjedhje në parti. Por cila ishte arsyeja e gjithë atij incidenti në Elbasan që solli më pas debate të ashpra edhe në mbledhjen e grupit parlamentar? Në një intervistë për gazetën “Shqip”, anëtari i PS-së, profesor në Universitetin e Elbasanit, në degën e Gazetarisë, tashmë i votuar nga delegatët e Kongresit të PS-së sqaron gjithë konfliktin me deputetin Blushi.
“Unë i kam ndjekur reagimet dhe nuk kam çfarë të them, sepse nga incidenti i Elbasanit unë ndihem i fyer. Duke qenë se jam sharë në atë mbledhje, nuk ke çfarë përgjigje t’i japë. Por ajo që dua të sqaroj është fakti se nuk është aspak e vërtetë që unë të kem armiqësi personale me deputetin Ben Blushi. Incidenti i Elbasanit ishte thjesht një keqkuptim. Po flas për atë çfarë ndodhi në atë mbledhje të hapur dhe për atë që provokoi reagimin e kolegut Blushi, që për hir të së vërtetës ishte i ashpër. Në atë reagim unë isha viktima e atij incidenti, viktimë e fjalorit të përdorur nga Blushi. Si i tillë nuk kam çfarë të them më shumë. Nuk e kuptoj dhe nuk ka arsye pse të përmendë emrin tim. Vazhdon luan me emrin tim në mënyrë qesharake dhe vulgare. Kapet me mbiemrin në mënyrë qesharake, unë e kam “Çiftja” ai ma bën me “Q”, që mendoj se është diçka vulgare nga ana e tij. Asambleja ka gjithë ata anëtarë dhe nuk e kuptoj pse ai merret me emrin tim. Kjo është e padrejtë, e paarsyeshme. Ne në Elbasan themi që “Na ke hyrë në hak”, thotë ai.
Ndër të tjera, ai rrëzon edhe akuzat se ka qenë anëtar i PR-së. “Unë kam vite në Partinë Socialiste. Kam të paktën 15 vite që kontribuoj për këtë parti dhe kam punuar edhe në fushatën e 2013-s, ku deputet në listën për deputetë në Qarkun e Elbasanit, ka qenë edhe Ben Blushi. Në këtë drejtim, ai është duke shpifur dhe duke sharë pa të drejtë. Edhe për këtë pjesë, gjithçka është një shpifje”, ka thënë zyrtari i PS-së për gazetën “Shqip”.
