Dy ngjarje tragjike janë shënuar brenda pak minutash në distancë nga njëra tjetra në Sarandë dhe Vlorë. Mësohet se rreth orës 13:00, Policia e Sarandës ka marrë njoftimin se është mbytur një person në liqenin e Butrintit.
Menjëherë Shërbimet e Policisë pasi janë afruar në vendin e ngjarjes, ku kanë konstatuar se babë e bir, Edmond dhe Santiago Shahini kanë qenë duke peshkuar me një varkë të vogël në liqenin e Butrintit. Por për shkak të dallgëve, varka ka marrë ujë dhe është përmbysur. 18-vjeçari Santiago Shahini ka mundur të dalë me not duke ka shpëtuar, ndërsa babai i tij nuk ka mundur të dalë dhe dyshohet të jetë mbytur në ujë.
Shërbimet e Policisë të Komisariatit Sarandë po punojnë për gjetjen e trupit të këtij shtetasi si dhe janë njoftuar Shërbimet e Policisë Kufitare të Sarandës, të bashkëpunojnë për gjetjen e tij.
Ndërkohë që një 24-vjeçar është mbytur në grykëderdhjen e lumit Vjosë rreth orës 13:20 të ditës së sotme. Shërbimet e Policisë kanë konstatuar se në grykëderdhjen e lumit Vjosë, kanë qenë 4 shtetas duke lundruar mbi një varkë me qëllim për të kaluar në anën tjetër të lumit.
Në mes të lumit, varka është përmbysur dhe 3 prej këtyre shtetasve kanë mundur të dalin nga lumi duke notuar, ndërsa njëri prej tyre, i identifikuar si Vasil Kola, 23 vjeç, nuk ka mundur t’ia dalë dhe për pasojë dyshohet të jetë mbytur në ujë pasi ende nuk është bërë e mundur gjetja e tij. Shërbimet e Policisë së Vlorës ndodhen në vendin e ngjarjes dhe po punojnë për gjetjen e trupit të 23-vjeçarit me banim në fshatin Poro, Vlorë.
(Boldnews)
