Sa herë hap gojë, kryetarja e FRESSH, Joleza Koka nxjerr ‘xhevahirë’. Kësaj radhe goditja vjen direkt nga Kongresi i PS-së që u zhvillua më 19 mars. Joleza është pyetur nga gazetarja e emisionit “Stop” se kë ka idhull dhe përgjigjja e saj ka qenë se për ata që besojnë në fe, idhujt dhe hyjnitë janë nga bota e përtejme.
Por në fakt si feja kristiane ashtu edhe ajo myslimane nuk i lejojnë idhujt. Feja islame, e quan mëkat besimin në idhuj e hyjni, ndërsa Joleza Koka, thotë se nëse themi se në botë ka idhuj, atëherë kemi dalë në përfundimin se “besojmë tek feja”.
“Në botë nuk ka idhuj, ato janë hyjnitë që janë në botën e përtejme, nëqoftëse pranojnë që besojmë tek feja. Bota ku ne jetojmë është plot me njerëz që mund të bëjnë edhe gabime edhe mund të bëjnë gjëra të mira kështu që nuk besoj se ka njeri për tu adhuruar”, tha Koka.
Më herët të rinjtë e FRESSH u pyetën se kë preferonin nga e majta europiane, Silvio Berlusconin apo Manfred Weber dhe pjesa më e madhe zgjidhnin Berlusconin, kur në fakt të dy janë politikanë europianë të djathtë.
(Boldnews)
