Mbi 1 kg Heroinë e fshehur në kuti boje dhe dy të arrestuar janë rezultatet e operacionit të koduar “Body” nga policia e kryeqytetit. ËShtë dashur nuhatja e qenit antidrogë që të zbulohet droga e fshehur në kuti boje me shkrimin “Liquid Body”, nga ku ka marrë emrin edhe operacioni.
Dy personat e arrestuar janë:
1. Anest Koromani, 35 vjeç, lindur dhe banues në Skrapar .
2. Romeo Beqa, 34 vjeç, lindur në Tepelenë dhe banues në “Progonat” Tepelenë.
Në bazë të informacioneve që dispononte Seksioni për Narkotikët në Drejtorinë Vendore të Policisë Tiranë, se një automjet po transportonte lëndë narkotike të forta, në rrugën nacionale Durrës-Tiranë në vendin e quajtur Kashar, është organizuar operacioni, në bashkëpunim edhe me Seksionin e Forcave të Posaçme “Shqiponja” duke çuar në kapjen e dy personave.
Nga kontrolli i ushtruar rezultoi se brenda automjetit tip “Mercedez Benz” me targë AA 221 IS që drejtohej nga Anest Koromani, ndodheshin 561 gramë lëndë narkotike e dyshuar si “Heroinë”.
Në momentin e kapjes në flagrancë nga Policia shtetasi Romeo Beqa ka tentuar të largohet por është kapur disa metra larg automjetit.
Lënda narkotike e dyshuar si ajo e “Heroinës” ishte fshehur në 5 kuti metalike bojrash për lyejre automjetesh me mbishkrimin “Liquid Body” e cila u identifikua nëpërmjet qenit për zbulimin e lëndëve narkotike.
Gjithashtu gjatë kontrollit të banesës së shtetasit Romeo Beqa është gjetur edhe sasia prej 508 gramë lëndë narkotike e dyshuar si “Heroinë” .
Në cilësinë e provës materiale janë sekuestruar përveç 1069 gramë lëndë e dyshuar si “Heroinë edhe 4 telefona celularë, automjeti tip “Mercedez Benz” me targa AA 221 IS dhe 5 kutitë e bojërave.
Sipas ekspertëve sasia e lëndës narkotike të sekuestruar do të kapte vleren prej rreth 70 mijë Euro po të shitej me doza. Materialet proceduriale do t’i kalojnë Prokurorisë së Rrethit Gjyqësor Tiranë për veprën penale “Prodhim dhe Shitje të narkotikeve ne bashkëpunim” .
(Boldnews)
