United është mbreti i Mançesterit. “Djajtë e Kuq” kanë marrë një fitore shumë të rëndësishme në fushën e rivalëve të tyre të përjetshëm, Manchester City.
Kjo humbje ka dërguar “Citizens” 15 pikë larg vendit të parë në kampionat, ndërsa skuadra e Louis van Gaal tani ndodhet vetëm një pikë larg vendit të katërt, që garanton kualifikimin në Champions League dhe që mbahet pikërisht nga kushërinjtë e City, të cilët kanë marrë vetëm një fitore në gjashtë ndeshjet e fundit të luajtura në kampionat. Marcus Rashford, 18 vjeç e 141 ditë, është bërë lojtarii më i ri që shënon në derbin e Mançesterit Super sfida e javës së 30-të e Premier League është zhbllokuar në minutën e 16-të kur Rashofrd ka shmangur me lehtësi Demichelis para se të dërgonte topin në rrjetë me një goditje të saktë me të djathtën.
Një moment historik ky sepse sulmuesi i United është bërë lojtari më i ri që shënon gol në derbin e Mançesterit në moshën 18 vjeç e 141 ditë. Situata është përkeqësuar më tej për Manchester City, që ka humbur Sterling për shkak dëmtimi në minutën e 26-të dhe portierin Hart në minutën e 50-të, pas një përplasje me sulmuesin e “Djajve”, Anthony Martial. Sergio Aguero ka zhgënjer edhe në ndeshjen e sotme, duke humbur disa raste Në minutën e 66-të “Citizens” kanë shkuar shumë afër golit pas një kombinimi mes Toure dhe Aguero.
Mesfushori ka dhënë një krosim perfekt në zonë për argjentinasin, që ka goditur menjëherë me kokë, por topi ka përfunduar në shtyllë. Gjashtë minuta më vonë Aguero ka humbur një tjetër rast pas një asisti perfekt nga ana e David Silva, me lojtarin që, në vend që të godiste portën, ka pasuar topin në mesin e zonës së rreptësisë ku nuk është ndodhur asnjeri. Vendasit i kanë shtuar sulmet dhe në minutën e 75-të ka qenë spanjolli Navas që ka kërcënuar portën e De Gea-s, por goditja e tij ka përfunduar sipër traversës.
Në minutën parë të kohës shtesë, nga gjashtë që janë dhënë në total nga arbitri, Sergio Aguero ka pasur një tjetër rast për të shpëtuar ekipin e tij nga humbja. Pas një kontrolli të bukur të topit me gjoks, argjentinasi ka goditur menjëherë portën me të djathtën, por edhe kjo gjuajtje ka përfunduar jashtë. United ka arritur të mbrojë avantazhin deri në minutat e fundit, duke marrë një fitore që mund të konsiderohet edhe si momenti më i bukur i këtij sezoni zhgënjyes për “Djajtë e Kuq”. Në ndeshjen tjetër të pasdites së sotme, Tottenham i është kundërpërgjigjur Leicester, duke marrë një fitore bindëse kundër Bournemouth në shtëpi.
Lojtarët e Mauricio Pochettino kanë fituar 3-0 dhe Harry Kane, i cili ka realizuar një dygolësh, është bërë lojtari i pestë në historinë e Premier League që realizon 20 ose më shumë gola në dy sezone të njëpasnjëshme. Lojtari i kombëtares angleze tani kryeson renditjen e golashënuesve me 21 gola, dy më shumë se sulmuesi i “Dhelprave”, Vardy, i cili është në kuotën e 19 golave. Erikssen ka qenë autori i golit të tretë për Tottenham.
Manchester City-Manchester United 0-1
Shënues: Rashford 16’
Manchester City: Hart (Caballero 50’), Sagna, Demichelis (Bony 53’), Mangala, Clichy, Toure, Fernandinho, Navas, Silva, Sterling (Fernando 26’), Aguero. Trajner: Pellegrini.
Manchester United: De Gea, Darmian (Mensah 84’), Smalling, Blind, Rojo (Valencia 62’), Carrick, Schneiderlin, Lingard, Mata (Schweinsteiger 70’), Martial, Rashford. Trajner: Van Gaal.
Gjyqtar: Oliver Kartonë të verdhë: Mangala/Smalling
