Kur mbeten edhe rreth 80 ditë nga fillimi i eksperiencës historike të Shqipërisë në Kampionatin Europian, gjithashtu në vigjilje të dy ndeshjeve miqësore që Kombëtarja Kuqezi do të zhvillojë në kuadër të përgatitjeve për eventin e “Francë 2016”, respektivisht ndaj Austrisë dhe Luxemburg, trajneri italo-shqiptar i përfaqësueses do të dalë nesër në konferencë për mediat.
Lajmi është bërë publik nga zyrtarët e FSHF-së, të cilët konfirmojnë gjithashtu se nesër, në daljen e tij publike, trajneri Gianni De Biasi do të publikojë edhe listën e futbollistëve të grumbulluar për këto dy takime testuese. De Biasi do të publikojë listën e futbollistëve të grumbulluar pë miqësoret ndaj Austrisë dhe Luxemburgut. “Trajneri i kombëtares së Shqipërise, Giovanni De Biasi, do të jetë nesër në orën 10:30 paradite, në një konferencë për shtyp përpara dy ndeshjeve miqësore të fundmarsit.
Drejtuesi i pankinës kuqezi, do të flasë përpara mediave në lidhje me synimet që ka për këto ndeshje dhe për të gjithë fushatën përpara Europianit Francë 2016. Ai do të deklarojë edhe listen e të përzgjedhurve të tij për këto ndeshje. Shqiperia do t’i luaje dy miqësoret e radhes në Austri më datë 26 mars dhe në Luksemburg, më datë 29 mars”, citon njoftimi i publikuar nga FSHF.
