Barcelona ka regjistruar barazimin e parë në kampionat pas 12 fitoresh të njëpasnjëshme.
Lojtarët e Luis enrique kanë shpërdoruar një avantazh prej dy golash, duke barazuar 2-2 me skuadrën e Villarreal. Ky rezultat, gjithsesi, e ka lejuar Barçën ta çojë në 39 numrin e ndeshjeve të njëpasnjëshme të luajtura në të gjitha kompeticionet pa pësuar humbje dhe të thellojë me nëntë pikë diferencën me Atletico Madrid të vendit të dytë.
Ndeshja është zhbllokuar pas 20 minutash lojë kur Ivan Rakitic ka kaluar në avantazh Barçën duke përfituar nga një rrëmujë në zonën e Villarreal pas një goditje dënimi të Messi-t. Kastër minuta para fundit të pjesës së parë miqtë kanë realizuar edhe golin e dytë pas një penalltie të fituar nga Neymar, që ka shkaktuar shumë polemika. Braziliani është rrëzuar në zonë nga portieri Asenjo, i cili është vënë në kontroll të topit, por e ka bërë këtë pasi ka prekur fillimisht këmbë e djathtë të katalanasit.
Arbitri Sanchez nuk ka pasur dyshime dhe ka akorduar menjëherë penalltinë, që është transformuar në gol nga vetë Neymar. Kur mendohej se Barcelona do të regjistronte një tjetër fitore të thellë ka ardhur reagimi i “Nëndetëses së Verdhë” që ka ngushtuar fillimisht diferencat me Bakambu në minutën e 57-të para se të barazonte në të 63-ën falë një autogoli të Mathieu, i cili është aktivizuar në minutën e 55-të në vend të Pique. Ky ka qenë edhe autogoli i parë i realizuar nga kampionët në fuqi të Spanjës në të gjitha kompeticionet në këtë sezon. Në minutat e fundit të takimit Villarreal ka protestuar për një penallti, por arbitri e ka konsideruar ndërhyrjen e Macherano si të rregullt dhe rezultati ka mbetur i pandryshuar.
Villarreal-Barcelona 2-2
Shënues: Bakambu 57’, Mathieu 63’ (aut)/Rakitic 20’, Neymar 41 (pen)
Villarreal: Asenjo, Mario, Bailly, Victor Ruiz, Rukavina, Castillejo, Trigueros, Bruno, Denis Suarez (Pinta 74’), Soldado (Baptistao 84’), Bakambu (Adrian 71’). Trajner: Marcelino.
Barcelona: Bravo, Roberto, Pique (Mathieu 55’), Mascherano, Alba, Rakitic, Busquets, Turan (Alves 57’), Messi, Neymar, Suarez. Trajner: Enrique.
Gjyqtar: Sanchez
Kartonë të verdhë: Soldado, Bruno, Asenjo, Ruiz, Rukavina, Pina, Mario, Trigueros/Turan, Pique, Alba, Mascherano
