Besart Berisha vijon të mbetet vendimtar dhe deçiziv për skuadrën e Melbourne Victory në kampionatin Australian.
Ish-futbollisti i Kombëtares Kuqezi ishte sot protagonist kryesor në ndeshjen që ekipi i tij, Melbourne Victory barazoi me rezultatin 1-1 me Newcastle Jets, e vlefshme për javën e 24-t të kampionatit Australian.
Ishte pikërisht futbollisti me kombësi shqiptare ai që në minutën e 57’ ka realizuar golin e barazimit për skuadrën e tij.
Me golin e realizuar sot, duke shpëtuar ekipin e tij nga humbja, Berisha shkon në kuotën e 16 golave të realizuar në 24 javë kampionat, për të qenë në mënyrë absolute bomberi i ekipit të Melbourne Victory.
Ndërkohë Berisha ka regjistruar emrin e tij si shënues edhe në AFC Champions League, ku në tre ndeshjet e zhvilluara ka realizuar një gol. Por, pavarësisht produktivitetit që Berisha vijon të shfaqë me ekipin e tij në Australi, ai mbetet gjithsesi i refuzuar nga trajneri i Kombëtares Kuqezi, Gianni De Biasi.
