Kategoria Superiore, java e 27-të 19.03.2016
TERBUNI-LAÇI 1-1 Golat: Karakaçi 61’ / Nimani 90’
20.03.2016 BYLIS – VLLAZNIA (14:00)
TIRANA – KUKËSI (17:00)
SKËNDERBEU – FLAMURTARI (17:00)
TEUTA – PARTIZANI (17:00)
Valdano Nimani evitoi humbjen e radhës për kurbinasit Laçi mbetet në njëlloj krize, sepse nuk e njeh fitoren prej 6 ndeshjesh në kampionat, që më datën 13 shkurt 2016, në Vlorë. Nga ajo transfertë deri në transfertën e sotme të Pukës, kurbinasit e drejtuar nga Stavri Nica kanë marrë dy barazime, në Shkodër, ndaj Vllaznisë, dhe sot, në Pukë, “in extremis”. Ballafaqimet e tjera i kanë humbur gkjysmfinalistët e Kupës së Shqipërisë dhe fituesit në fuqi të këtij trofeu, duke vendosur një rekord mjaft negativ. Më shumë se kaq, tashmë bardhezinjtë kanë vetëm 4 pikë më shumë se skuadra shkodrane, e cila është e përfshirë në luftën për mbijetesë. Abaz Karakaçi, kapiteni dhe autori i golit për Tërbunin Një fitore e mbetur në tentativë e Tërbunit, që udhëhiqte deri në limitin e kohës së rregullt. Goli i Karakaçit, nga goditja e dënimit, në minutën e 61-të, u duk se do të shtonte tri pikë shprese për pukjanët, por shkodrani Valdano Nimani ua ka prishur planet vendësve. Ai ka konkretizuar ofensivën evidente të të tijve në kërkim të shmangies së disfatës së radhës, duke shtuar një pikë në llogarinë e Laçit, që ruan vendin e 6-të, me 30 pikë, 10 të tilla më pak se skuadra pararendëse, Tirana, dhe fare pak larg zonës së mbijetesës.
Pukjanët vijojnë të luajnë fort, edhe pse shanset për mbijetesë janë minimizuar ndjeshëm Nga ana e tij, Tërbuni ruan vendin e fundit, me 14 pikë, duke mbetur favoriti kryesor për një kategori më poshtë, andej nga ka ardhur. Kujtojmë se kjo ishte ndeshja hapëse e javës së 27-të të Superiores, e fundit për fazën e tretë.
Nesër do të luhen katër ballafaqimet e tjera, për t’ia lënë vendin “aktit” të fundit, fazës së katërt, me më shumë emocione, ankth dhe intriga sportive.
Dorëhiqet Nica – Ndërkohë, trajneri i kurbinasve, Stavri Nica, ka deklaruar dorëheqjen pas barazimit në Pukë. Do t’i qëndrojë kësaj deklarate, apo do të rikthehet, sepse të tilla “batica-zbatica” ka pasur edhe në të shkuarën trajneri durrsak, që e drejton Laçin për herë të shtatë. “Jap dorëheqjen nga drejtimi i Laçit. Skuadra nuk më përgjigjet dhe nuk kam çfarë të bëj më në krye të saj. Drejtuesit duan të qëndroj, por është e pamundur në këtë fazë që ka arritur skuadra. Të jesh aty-aty me Tërbunin, do të thotë se gjithçka ka shkuar afër degradimit. U kërkova djemve të reagonin, por sërish nuk m’u përgjigjën. Atëherë, për çfarë duhet t’u prij në vazhdim?! Ekipi duket i plakur. Kur s’më përgjigjen lojtarët, s’kam pse ta vazhdoj punën deri në fund, as për Kupë,” – ka nënvizuar Nica, mjaft i mërzitur nga të tijtë.
