Nismës “Fundjavë ndryshe” për tu ardhur në ndihmë familjeve të varfra të kryeqytetit, i janë bashkuar edhe vogëlushët e kopshtit ‘Princi i Lumtur’.
Nën logon “Bamirësia nuk të varfëron”, këto familje ndihmohen jo vetëm me ushqime, por edhe me artikuj të ndryshme shkollorë dhe rroba, por njëkohësisht ata që japin ndihmën e tyre, prekin nga afër kushtet e vështira ku familje të tilla jetojnë.
Fëmijët e këtij kopshti, së bashku me edukatoren e tyre, Elona Selamaj e cila ishte iniciatore dhe organizuese për të iu bashkuar kësaj nisme humane, ishin sot në një familje të varfër në zonën e Institutit, në Kamëz.
Ata kontribuan me ushqime dhe detergjente të ndryshëm në ndihmë të kësaj familje.
Ndërsa kishin dy javë që përgatitesh për tu bërë pjesë e kësaj iniciative, bamirësit e veçantë, i dhuruan kësaj familje në gjendje të rëndë ekonomike edhe një televizor.
Fëmijët nuk zgjodhën vetëm të dhuronin ushqime por edhe t’u falnin disa momente të bukura fëmijëve të kësaj familje të varfër duke ndarë me ta lojra dhe recitime të ndryshme të mësuara nga edukatoret e tyre.
Kjo ishte një përvojë e veçantë, e paharrueshme dhe nxitëse për fëmijët e kopshtit ‘Princi i Lumtur’ duke përcjellë mesazhin e bamirësisë edhe për të gjithë fëmijët e tjerë pasi të dhurosh thjesht të bën të ndjehesh i lumtur.
