Ka bërë xhiron e ditës nëpër të gjitha mediat sportive napoletane deklarata e trajnerit Gianni De Biasi, dhënë për “calciomercato.com”, në lidhje me futbollistin e talentuar me kombësi shqiptare, Milot Rashica.
Ky i fundit, ndonëse nuk është ende zyrtarisht kontigjent në listën e Kombëtares Kuqezi për “Euro 2016”, është prej kohësh nën vëzhgimin e imtësishëm të trajnerit italo-shqiptar të Përfaqësueses së Shqipërisë.
De Biasi u këshillon ekipeve italiane Rashicën që sipas tij ngjason me Callejon. Madje, De Biasi, ka nisur tashmë të bëjë rolin e menaxherit, apo shkesit të Rashicës, teksa e sugjeron atë në Seria A.
Trajneri i Kombëtares Kuqezi shkon edhe përtej, teksa e krahason Rashicën me Callejon, futbollistin e Napolit, duke e këshilluar atë direkt për ekipin napoletan, si një zëvendësues për spanjollin.
Një deklaratë kjo e De Biasit për Rashicën që shërben jo vetëm si marketing për futbollistin në tregun më të vlerësuar europian, por gjithashtu edhe si një sinjal pozitiv për futbollistin 20-vjeçar, mbi një ftesë edhe më të mundshme për në “Francë 2016”. “Po e ndjekim. Është patjetër një futbollist i këshillueshëm për një ekip Italian.
Ngjason me Callejon, sidomos fizikisht, është i asaj stature dhe ka vrapim. Në të ardhmen mund të përbëjë komoditet për çdo ekip. Mbi të gjitha ka mendjen në vendin e duhur dhe ka një familje të mirë. Të gjitha këto garanci në këtë moshë të re”, janë këto fjalët e thëna nga De Biasi për “calciomercato.com” që qarkulluan sot në të gjitha mediat audo-vizive sikurse dhe të shkruara-elektronike, lokale të Napolit.
