Ekzekutimi i Ajet Zeqajt ka qenë një vrasje e një profesionisti me pagesë, mësohet nga policia. Deri më tani nga hetuesit e ngjarjes thuhet se atentatori ka kryer një vrasje në gjakftohtësi të plotë duke mos lënë asnjë gjurmë në vendin e ngjarjes.
Në pamjet e pakta, që policia ka siguruar, nga kamera të bizneseve pranë vendit të ngjarjes, atentatori ka ecur pasi kreu ekzekutimin. Me kokën ulur, për të mos u identifikuar nga kamerat, ai është larguar i qetë nga vendi i ngjarjes.
Është e vërtetë që atentatori la pistoletën në vendin e ngjarjes, por ai mbante veshur doreza dhe nuk ka lënë asnjë gjurmë, thanë ekspertët e policisë shkencore. Për armën po kryhen ekzaminimet krahasuese me gëzhojat e gjetura në ngjarje të ndryshme.
Vrasësi mendohet se e ka ndjekur dhe vëzhguar prej disa ditësh Ajet Zeqajn. Ditën e ngjarjes ai është parë nga dëshmitarë, duke pritur Zeqajn jashtë bilardos.
Ai dyshohet se është përfshirë në trafik droge në Francë, por kjo mbetet ende në dyshim.
