Athletic Bilbao, Villareali dhe Sparta e Pragës ishin tri skuadrat e para që siguruan një biletë në fazën cerekfinale të Europa League pas takimeve të kthimit që u luajtën në orën 19:00.
Bilbao arriti një kualifikim dramatik në “Mestalla” të Valencias, ku u mposht me rezultatin 2-1, por falë suksesit 1-0 në fushën e tyre baskët vijojnë më tej.
Vetëm pas 13 minutash lojë, Valencia kaloi në avantazh falë golit të Santi Minas që mposhti portierin Herrerin, pasi ky i fundit i kishte mohuar golin Negredos, ndërsa në të 37-tën dyfishoi me kokë Aderlan Santos, pasi krosimit të Gayas.
Reagimi i Athektic Bilbaos erdhi 13 minuta para përfundimit të kohës së rregullt me Aduriz, i asistuar në këtë rast nga Raul Garcia….
Valencia bëri gjithcka për të shënuar golin që do t’i jepet kualifikimin, por skuadra baske e ndihmuar edhe nga fati, e ruajti të pandryshuar rezultatin.
Skuadra e Villarealit u mjaftua me një barazim 0-0 në “Bay Arena” ndaj Bayer Leverkusenit, dhe falë fitores 2-0 në El Madrigal kalon në cerekfinale.
Zhgënjen në “Olimpico” të Romës Lazio, skuadra e vetme italiane e mbetur në fazën e 1/8 tave të Europa League. Skuadra e Piolit u mposht 0-3 nga Sparta e Pragës, duke konfirmuar momentin jo të futbollit italian në kompeticionet europiane.
Bardhekaltrit zhvilluan një pjesë të parë katastrofë, ku u detyruan ta nxirrnin tri herë topin nga rrjeta. Dockal shënoi që në minutën e 10 në portën e Marchetit, ndërsa dy minuta më pas Krejci i coi shifrat në 0-2. Goditjen përfundimtare Lazio e mori në fund të pjesës së parë kur Julis realizoi golin e 0-3.
