Eliminimi i fundit, ai i pësuar nga Lazio në Europa League, të enjten pasdite, ende pa filluar çerekfinalet e Kupave të Europës, i djeg shumë kampionatit italian të futbollit që nuk do të ketë asnjë përfaqësues në tetë ekipet më të mira në Champions dhe Europa League.
Një dështim me të tilla përmasa nuk ishte parë që nga viti 2001, kur Parma dhe Inter u eliminuan në 1/8-t e finaleve, ndërsa Milan dhe Lazio nuk kaluan grupet e dyta të Champions League, si ka qenë formula e vjetër.
Shkatërrimi nisi që në fillim të gushtit, kur Sampdoria u eliminua nga Vojvodina në Europa League, ndërsa Lazio u eliminua nga Leverkusen, që e detyroi të shkonte nga Champions League në Europa League. Juventus, Roma në Champions League dhe Fiorentina, Lazio dhe Napoli në Europa League, e kaluan pa probleme fazën me grupe, por të pesë këto ekipe u eliminuan në sfidat me eliminim direkt. Juve dhe Lazio ishin pranë çerekfinales, por nuk ia dolën.
Ky regres i klubeve italiane në Kupat e Europës i penalizon për vazhdimësinë. Koeficienti i Serie A vjen në rënie, në renditjen e UEFA-s, dhe as që mund të mendojë t’i marrë skuadrën e katërt në Champions, Premier League. Italia do të vazhdojë të ketë tre skuadra në Champions edhe në sezonin 2017-18 dhe faktikisht me të tilla paraqitje e ardhmja mund të jetë edhe më e zymtë. Juventus shpëton nderin duke shkuar deri në finale, sezonin e kaluar, ndërsa tani gjërat janë bërë kaotike./ Telesport
