Pellegrini: “Barcelona, ekipi për t’u mundur, çerekfinalistët e tjerë në të njëjtin nivel”

Manuel Pellegrini mendon se Manchester City i ka ‘mbyllur gojën’
shumë kritikëve për sa i përket cilësisë së mbrojtjes, pas barazimit pa gola që i çoi anglezët në çerekfinalen e Champions League. City arriti të ruante rezultatin 3:1 e ndeshjes së parë, megjithëse kapiteni i ekipit Vincent Kompany duhet të linte fushën i dëmtuar teksa Otamendi i zuri vendin dhe bëri një punë të mirë. “Për mendimin tim ishte një ndeshje taktike. As Dinamo nuk rrezikoi,” thotë Pellegrini. “Ekipi ka marrë shumë kritika për mënyrën se si mbron, dhe është pak e vështirë ta analizosh. Mbrëmë mbrojtëm pa probleme. Kur ke tetë apo nëntë lojtarë pranë zonës është shumë e thjeshtë të mbrosh.” Kundërshtari i radhës pritet t’i bëjë më shumë presion City-t në mbrojtje. “Në këtë fazë të kompeticionit, nuk ka më ekipe të lehta. Mendoj se ekipi për t’u mundur do të jetë Barcelona. Ekipet e tjera më duken në të njëjtin nivel.” Pellegrini është i lumtur për kalimin historik në çerekfinale. “Ne dolëm të parët në grup. Nuk e di nëse jemi më të përgatitur, por me siguri kemi më shumë eksperiencë. Shpresoj të shkojmë më tej.”