Rummenigge: Klubet elitare duhet të formojnë një kampionat ekskluziv

Pushteti i madh i PSG dhe Bayern Munich mund të transformojë në realitet idenë e një Super League Europiane me skuadrat më të mira të kontinentit. Një ide që për momentin është vetëm në letër, por që pëlqehet gjithnjë dhe më shumë nga presidenti i bavarezëve, Karl-Heinz Rummenigge, i cili është edhe kryetari i Shoqatës së klubeve europiane. Drejtuesi bavarez është kthyer të flasë për idenë e një kampionati ekskluziv në një intervistë për “L’Equipe”. “Me UEFA-n po zhvillohet një diskutim në lidhje me evoluimin e kompeticioneve europiane. Përveç Champions League dhe Europa League ndoshta do të ishte e domosdoshme të krijohej edhe një kompeticion i tretë sipër Champions-it”. “Ka shumë ide, por për momentin nuk është marrë asnjë vendim. Unë jam pro krijimit të këtij kompeticioni, por duhen vlerësuar të mirat dhe të këqijat e një nisme të tillë”. Me pak fjalë, Rummenigge nuk është kundër idesë së Super League. Megjithatë, drejtuesi gjerman nuk do të eliminojë kompeticionet kombëtare: “Teorikisht një kampionat europian për klube mund të jetë në dëm të kompeticioneve kombëtare, por ne duam që këto të vazhdojnë. Duhet të jetë një evoluim dhe jo një revolucion”, ka thënë Rummenigge. Nëse kjo Super League do të krijohej, në të do të merrnin pjesë vetëm klubet që dominojnë kampionatet respektive. Si Bayern, për shembull: “Që nga 2010-ta janë vetëm dy ekipe që dominojnë në Bundesliga: Bayern dhe Borussia. Kampionatet e tjera? Juventus dhe Napoli dallohen në Itali; PSG në Francë; Barcelona, Real dhe Atletico në Spanjë; tre ose katër skuadra në Angli”. Këto klube mund t’i japin jetë një turneu që do t’i hapte oreksin televizioneve në të gjithë botën.