Misioni çerekfinalja e Champions League: Bayern thur planin anti-Juve

Pas fitores bindëse gjatë fundjavës që sapo lamë pas, trajneri i Bayern Munchen, Pep Guardiola e ka kthyer vëmendjen plotësisht te sfida e mesjavës kundër Juventus. Bavarezët do të presin ekipin italian në “Allianz Arena” ditën e mërkurë, teksa ndeshja e parë ka përfunduar me rezultatin 2:2. Fitorja 5:0 kundër Werder Bremen padyshim që e ka çuar në qiell moralin e gjermanëve, teksa tekniku katalanas është duke punuar për taktikat që do të përdorë mbas dy ditësh. Mesa duket, Guardiola do të mbështetet te krahët, ku gjermanët kanë një tufë mesfushorësh të talentuar dhe të aftë për të goditur italianët. “Ne duhet të jemi tepër të zgjuar kundër Juve-s,” pranon ish-trajneri i Barcelona-s. Dysha Robben-Ribery janë arma kryesore e krahëve të Bayern, teksa të dy janë të aftë të destabilizojnë mbrojtjen kundërshtare, përveçse janë përgatitës të mirë golash dhe golashënues vetë. Në anën tjetër janë edhe Douglas Costa dhe Coman, të rrezikshëm sa herë kanë hapësirë teksa shfrytëzojnë shpejtësinë e tyre për të dëmtuar kundërshtarin. Sidomos i riu francez ishte në formë të mirë, teksa dhuroi tre asiste kundër Werder. Padyshim që forca e Bayern nuk është vetëm loja në krahë. Ata kanë shumë opsione edhe në qendër me Muller, Vidal, Alcantara dhe Gotze. Pep duket i qet edhe në prapavijë teksa Benatia është rikthyer.