Ibra, Milito, Klose… kur goli nuk njeh moshë

Nga Italia në Francë, duke kaluar nga Amerika, pa harruar Turqinë dhe Argjentinën. Ajo që sapo lamë pas ka qenë fundjava e sulmuesve. Ata që nuk e humbin asnjëherë vesin e golit. Ata që, pavarësisht moshës, vazhdojnë të bëjnë diferencën. Sepse në futboll ka rëndësi vetëm ta dërgosh topin në rrjetë. Nga Klose tek Ibrahimovic, duke kaluar nga Villa, Van Persie dhe Milito: janë ata golashënuesit e pavdekshëm e fundjavës së fundit të futbollit botëror. IBRAHIMOVIC – Vrapimi i PSG-së drejt titullit të radhës në Francës është mbyllur me një fitore 9-0 ndaj Troyes, me Parisin që ka fituar Ligue 1 për vitin e katërt radhazi. Një fitore që ka pasur për protagonist Zlatan Ibrahimovic, autor i katër prej nëntë golave të realizuar nga lojtarët e Blanc. Nga 2012-ta, Ibrahimovic udhëheq sulmin e PSG me një vazhdimësi mbresëlënëse: janë 102 golat e realizuar nga ai në Ligue 1 dhe falë pokerit të së dielës numri i golave të tij në këtë kampionat (27) ka kaluar atë të ndeshjeve të luajtura (24). Një rekord i ri për suedezin, i cili nuk kishte shënuar asnjëherë kaq shumë gjatë karrierës së tij. Tani tifozët janë të shqetësuar për faktin se ai mund të largohet në fund të sezonit. KLOSE – Lazio-s i është dashur një Klose i kohërave të arta për t’u kthyer të fitorja, që mungonte në kampionat prej më shumë se një muaji. Me dygolëshin ndaj Atalanta-s, gjermani është kthyer te goli pas 9 muajsh dhe 13 ditësh dhe e ka bërë këtë si një golashënues i vërtetë, duke u gjendur në vendin e duhur në momentin e duhur. Vitin e kaluar e ka mbyllur me 13 gola, në këtë sezon është në kuotën e 2 realizimeve, edhe për faj të dëmtimit që ka pësuar në kofshë në fillimin e sezonit. Por tani Klose është kthyer dhe për Lazio-n, që shpreson akoma për një vend në Europë, është me të vërtetë një lajm i mirë. VILLA – Virusi i golashënuesve është shfaqur edhe në MLS. Në derbin me New York City dhe Toronto (Pirlo vs Giovinco), David Villa ka realizuar një dygolësh pas 5 minutash lojës: në fillim ka fituar dhe transformuar një penallti, më pas ka shfrytëzuar një penallti të Pirlos për të realizuar golin e dytë. Megjithatë këto gola nuk kanë mjaftuar për të siguruar fitoren: Giovinco ka fiksuar barazimin me një asisti për Perquis dhe një gol në minutën e 72-të. Villa ka pasur edhe rastin për të çuar shifrat në 3-2, por ka gabuar pasi Pirlo e ka nxjerrë të vetëm përballë portierit. VAN PERSIE – Tek Arsenal, ashtu si te Manchester United, ka treguar se di të shënojë dhe shumë. Robin Van Persie vazhdon ta bëjë këtë edhe në kampionatin turk: realizimi i fundit ka ardhur të dielën në ndeshjen kundër Kayserispor dhe i ka dhuruar tri pikë Fenerbahçe-s. Sulmuesit holandez, i cili tani është në kuotën e 10 golave në 24 ndeshje, i kanë mjaftuar tetë minuta për të realizuar golin e fitores dhe për t’u kthyer edhe një herë në qendër të vëmendjes. MILITO – Në moshën 37-vjeçare dhe 3 muaj larg tërheqjes, e parashikuar për në qershor të 2016-ës, edhe Diego Milito vazhdon të jetë vendimtar, pikërisht siç ka qenë gjashtë vite më parë kur ndihmoi Inter-in të pushtonte botën. Heroi i “tripletës” historike të zikaltërve, në javën e fundit të kampionatit, ka ndihmuar Racing të fitojë ndaj Lanus duke dhënë një asist për Romero dhe duke realizuar golin e 2-1-it përfundimtar. Ka qenë goli i tretë në kampionat për “Princin” pas dygolëshit të realizuar një javë më parë kundër Union. Me pak fjalë, kemi të bëjmë me ujqër të golit që ndërrojnë vazhdimisht qime (fanellë), por që nuk e harrojnë asnjëherë zakonin (golin)