Benatia dhe Evra “ndezin” Bayern-Juventus

Në mendjen e lojtarëve të Juventus janë vetëm dy fjalë: Bayern Munich. Bardhezinjtë po përgatiten për transfertën në “Allianz Arena”, ndeshja e kthimit e 1/8-ave të Champions League, dhe Patrice Evra ka dashur t’i japë një mesazh të qartë rivalëve: “Sfida e parë na ka treguar se mund t’i mposhtim, nëse në fushë do të zbresin lojtarë që janë të bindur se mund të fitojmë 1-0 atëherë mendoj se do të buzëqeshim ne në fund. Allegri e thotë gjithmonë, forca e Juventus qëndron te fakti se nuk dorëzohet kurrë”, ka thënë francezi. Nuk kanë munguar deklaratat as nga kampi bavarez. Ish-romanistit Benatia ka bërë të ditur se: “Gjatë viteve të kaluara në Itali mbaj mend se Juventus ishte skuadra që duhej mundur. Ata kanë qenë gjithmonë të pathyeshëm. Cili ekip do të kualifikohet? Bayern. Duhet të fitojmë Championsin. Mbaj mend një ndeshje me Romën në Torino, dukej se ishim më të fortë se ata, por në fund kemi humbur 3-0. Juventus di të fitojë edhe kur nuk luan mirë. Por të mërkurën duhet të shënojmë patjetër”. Ndërkohë është zbuluar edhe emri i arbitrit të supersfidës së të mërkurës në mbrëmje. Bëhet fjalë për suedezin Jonas Eriksson, i cili do të ketë si asistentë bashkëkombësit Mathias Klasenius dhe Daniel Warnmark, Stefan Johannesson dhe Markus Stroembergsson. Eriksson ka gjykuar një ndeshje të bardhezinjve në të kaluarën, atë të luajtur në Madrid kundër Real-it, që i ka siguruar Juventus-it finalen.