Kryetari i Kuvendit të Shqipërisë, njëherazi kryetari i Lëvizjes Socialiste për Integrim, Ilir Meta, mori pjesë sot në aktivitetin festiv të zhvilluar me rastin e Ditës së Verës në Gjirokastër, të organizuar nga Lëvizja Rinore për Integrim.
Në ketë aktivitet Kryetari i Kuvendit, Ilir Meta, shoqërohej nga deputeti i LSI-së, Vangjel Tavo dhe Kryetarja e Bashkisë Gjirokastër, Zamira Rami, shoqëruar nga artistë të shumtë që performuan në koncertin festiv, por edhe të rinj të talentuar gjirokastritë, që ekspozuan me këtë rast edhe punimet e tyre artistike para të pranishmëve.
IMG_9279Kryetari i Kuvendit, Meta, në fjalën përshëndetse u shpreh se “Është kënaqësi të jem për Ditën e Verës në Gjirokastër dhe t’u uroj të gjithë gjirokastritëve mbarësi. Besoj se me verën që po vjen, Gjirokastrës që përmes projekteve të ndryshme po zbukurohet akoma më tej, po i rikthehen vlerat e saj të jashtëzakonshme historike, kulturore, padyshim të kemi më shumë zhvillim, progres në të gjitha familjet tuaja. Por, kam ardhur në Gjirokastër se të rinjtë e të rejat gjirokastritë janë të jashtëzakonshëm, sepse jo vetëm Gjirokastra, por e gjithë Shqipëria duhet të ecë më shpejt në rrugën e progresit, në rrugën e zhvillimit, në rrugën e ndryshimeve në këtë periudhë sfidash, jo vetëm për Shqipërinë, por për të gjithë Europën, ndaj duhet të kemi më shumë të rinj e të reja të angazhuar si këtu në Gjirokastër”.
“Duhet të kemi më shumë të rinj dhe të reja të motivuar këtu në Gjirokastër, duhet të kemi më shumë të rinj e të reja të talentuar si këtu në Gjirokastër. Duhet të kemi më shumë të rinj dhe të reja solidarë dhe të bashkuar si këtu në Gjirokastër, sepse rinia mbetet fuqia dhe shpresa më e madhe për të ardhmen e Gjirokastrës dhe të gjithë Shqipërisë. Një rini që ka besim të vetja, një rini që e shikon të ardhmen e saj këtu, një rini që e do Gjirokastrën e saj, që e do Shqipërinë e saj, një rini e cila është në gjendje të marrë vetë në duart e saj fatin e saj dhe të vendit”, tha Meta.
IMG_9537Ndërsa deputeti i LSI-së, Vangjel Tavo, u shpreh se “Dua te uroj LRI-në për organizimin e këtij aktiviteti të mrekullueshëm me rastin e Ditës së Verës. Një aktivitet që tashmë është kthyer në traditë për qytetin dhe rrethin e Gjirokastrës dhe kjo pikërisht falë LRI-së. Këtë herë ky aktivitet ka edhe një risi. Siç e shikoni janë ekspozuar disa piktura të talenteve të reja anëtarë të LRI-së. Dua t’u uroj suksese të gjithë këtyre talenteve dhe anëtarëve të LRI-së”.
Kryetarja e Bashkisë Gjirokastër, Zamira Rami, tha se “Kemi këtë rini të mrekullueshme, që jep energji, që jep pozitivitet që jep më të mirën për Gjirokastrën tonë”.
Në fund, nga drejtuesit e LRI-së u shpërndanë disa çmime simbolike për punimet më të bukura të ekspozuara gjatë aktivitetit festiv.
