Në qytetin e Elbasanit është çelur panairi “Dita e Verës 2016”, i cili këtë vit vjen me 45 kompani, shumë prej të cilave marrin pjesë për herë të parë.
Panairi Dita e Verës është bërë traditë tashmë në qytetin e Elbasanit, dhe vjen për të 19-in vit me radhë. Kryetari i Bashkisë së Elbasanit Qazim Sejdini dhe Kryetari i Dhomës së Tregtisë Veli Kazazi vlerësuan këtë aktivitet që synon t’i japë rëndësinë e duhur biznesit.
Bizneset pjesëmarrëse e kanë vlerësuar këtë panair si një mundësi të mirë për të ekspozuar prodhimet e tyre. Ata shprehen se Dita e Verës sjell shumë turistë në Elbasan dhe kjo e bën edhe më të rëndësishëm këtë panair. Panari “Dita e Verës” do të qëndrojë i hapur deri në 15 mars, kur zyrtarisht mbyllen festimet për Ditën e Verës.
Panairi “Dita e Verës” i kthyer tashmë në traditë hapet dy ditë para festës pagane të “Ditës së Verës”, që është iniciuar shekuj më parë në qytetin e Elbasanit, por që vitet e fundit festohet në të gjithë vendin. Po kështu ka startuar edhe Edicioni i 14-të i Festivalit Folklorik Tipologjik Kombëtar i Këngës Popullore, i organizuar nga Ministria e Kulturës, Drejtoria e Veprimtarive Foklorike dhe Qendra e Artit në Bashkinë Elbasan.
Ky Festival mbahet çdo dy vjet në teatrin”Skampa” dhe çel festimet për festën tradicionale të ditës së Verës. Në këtë festival i cili do të mbahet për dy ditë do të marrin pjesë grupe nga Elbasani, Korça, Durrësi, Lezha, Berati, Shkodra etj. Elbasani në këtë festival do të paraqitet me tre këngë të reja dhe këngëtarë të rinj të cilët do të provojnë për herë të parë emocionet e skenës.
Në edicionin e 14 të Festivalit Folklorik Tipologjik Kombëtar të Këngës Popullore do të përshëndesin edhe grupe të njohura vendase, por edhe nga Kosova e Maqedonia . Një sërë aktivitetesh të tjera të larmishme pritet të gjallërojnë Elbasanin në festën e tij tradicionale.
