Berisha shkëlqen në dështimin e Anzhit

Një ditë e errët ka qenë kjo e sotmja për skuadrën e Anzhit, e cila në kampionatin rus, ka prekur sot fundin e klasifikimit, pas disfatës 4-2 ndaj Ural. Pas javës së 20-të, skuadra e Anzhit numëron vetëm 15 pikë, duke rrezikuar seriozisht rënien nga kategoria, teksa renditet në zonën e ftohtë të Premier League ruse. Gjithsesi, jo kaq negative ka qenë kjo ditë, për futbollistin shqiptar, Bernard Berisha, që aktivizohet te skuadra e Anzhit në kampionatin rus.
Përkundrazi, ish-sulmuesi i Skënderbeut, i transferuar në kampionatin rus gjatë merkatos së janarit, ka shkëlqyer në radhët e Anzhit, madje duke realizuar edhe golin e parë për skuadrën e tij, për të ngushtuar fillimisht disavantazhin në shifrat 2-1. Ky i sotmi ishte goli i parë i Berishës në kampionatin rus, pas dy ndeshjesh të luajtura. I bindur nga performanca e shqiptarit në ndeshjen e javës së kaluar, ku Berisha u aktivizua si zëvendësimi i vetëm për ekipin e Anzhit, trajneri i Anzhi Makhachkala preferoi të aktivizojë sot shqiptarin që nga minuta e parë, për ta zëvendësuar atë në të 77’. “Sot, goli im i pare. Falënderoj Zotin Zotin dhe lutem që t’na ndihmoj në ndeshjet e ardhshme”, shkroi Berisha në “facebook”.