Bayern “show”, festival golash kundër Werder Breme

Bayern Munich është kthyer te fitorja në kampionat pas dy ndeshjeve dhe ka shkuar tetë pikë larg Borussia Dortmund, që do të luajë ditën e nesërme në shtëpi kundër Mainz. Bavarezët kanë gjetur momentin e duhur për t’u kthyer te suksesi, duke parë se mesjavën e ardhshme do të presin Juventus në shtëpi për ndeshjen e kthimit të 1/8-ave të Champions League. Nëntë minuta i kanë i mjaftuar lojtarëve të Guardiola-s për të gjetur rrugën e golit kundër Werder Bremen dhe autori ka qenë Thiago Alcantara, i cili nuk shënonte në kampionat prej 748 ditësh. Në rolin e “asist-man”-it, francezi Coman.
Ish-lojtari i Juventus ka qenë protagonist edhe në minutën e 31-të të sfidës kur ka dhënë asistin e dytë për Thomas Muller, me këtë të fundit që ka çuar shifrat në 2-0 dhe ka realizuar golin e tij numër 26 në këtë sezon në të gjitha kompeticionet, duke barazuar kështu rekordin personal të vendosur në sezonin 2013/14. Në minutën e 66-të sulmuesi gjerman e ka thyer këtë rekord pasi ka realizuar golin e tretë për vendasit. Portieri Weidwald ka arritur të bëjë mrekullinë pas një goditje fluturimthi të Ribery, por nuk ka mundur të bëjë dot asgjë ndaj Muller, i cili ka qenë një metër larg portës.
Katër minuta para fundit bavarezët kanë arritur të gjejnë edhe dy herë të tjera rrugën e golit. Lewandowski ka realizuar “pokerin” në minutën e 86-të, para se Alcantara të realizonte golin e pestë të vendasve pas asistit të tretë të Kingsley Coman. Kjo ka qenë fitorja e 11-të radhazi e Bayern Munich kundër Bremen në kampionat dhe diferenca e golave në këto 11 përballje është 45-6 për kampionët në fuqi të Gjermanisë. Bayern Munich-Werder Bremen 5-0 Shënues: Alcantara 9’, 90’ Muller 31’, 66’, Lewandwoski 86’ Bayern Munich: Neuer, Lahm, Kimmich (Rafinha 68’), Benatia, Alaba, Alonso, Coman, Muller (Lewandowski 74’), Thiago, Ribery, Gotze (Rode 54’). Trajner: Guardiola. Werder Bremen: Weidwald, Gebre Selassie, Galvez, Vestergaard, Djilobodji, S. Garcia (U. Garcia 77’) , Oztunali (Kleinheisler 46’), Veljkovic (Lorenzen 46’), Grillitsch, Yatabare, Ujah. Trajner: Skripnik Gjyqtar: Winkmann Kartonë të verdhë: Ribery/Gebre Selassie, Djilobodji