Barcelona luan tenis me Getafe, fiton 6-0

Gjithçka është shumë e lehtë për Barcelona-n e Luis Enrique ose janë e lojtarët katalanas që e bëjnë të duket gjithçka shumë të lehtë. Edhe ndeshja e sotme kundër Getafe-s nuk ka pasur histori, ndërsa gjithçka është mbyllur në pjesën e parë, me kampionët në fuqi të La Liga-s që e kanë çuar në 37 rekordin e ndeshjeve të njëpasnjëshme të luajtura në të gjitha kompeticionet pa pësuar humbje. Askush nuk ka bërë më mirë se katalanasit në historinë e futbollit spanjoll. Ndërkohë, kjo e sotmja ka qenë edhe fitorja e dymbëdhjetë radhazi e Messi-t me shokë në kampionat. Leo Messi, i dëshpëruar pas humbjes së penalltisë Dhe vetë “Pleshti” ka qenë protagonist i të vetmes “njollë” që ka pasur paraqitja e sotme e Barcelona-s. Në minutën e 11-të argjentinasi është paraqitur te pika e bardhë pas një penalltie të fituar nga braziliani Neymar dhe ka gabuar. Një gabim që është shlyer në minutën e 40-të të pjesës së parë kur Messi ka çuar shifrat në 4-0 dhe ka realizuar golin e tij të 22-të në kampionat. Para këtij momenti, Rodriguez ka realizuar autogolin që ka zhbllokuar takimin në minutën e 8-të, ndërsa Munir (19’) dhe Neymar (32’) kanë qenë autorët e dy golave të tjerë të vendasve. Braziliani Neymar ka qenë autor i dy golave në sfidën e sotme Në pjesën e dytë, më saktësisht në minutën e 51-të, Neymar ka realizuar golin e pestë dhe të 19-in personal në këtë kampionat, pas një asisti të Leo Messi-t, i cili ka dhënë 3 asiste në një ndeshje të La Liga-s për herë të parë në karrierën e tij. Në minutën e 57-të ka ardhur edhe goli i gjashtë për lojtarët e Luis Enrique me Arda Turan. Barcelona tani kryeson kampionatin me 11 pikë diferencë ndaj Atletico Madrid, që do të luajë sot në mbrëmje kundër Deportivo La Coruna-s. Ndërsa vështirësohen akoma më shumë gjërat për Getafe, që ka regjistruar humbjen e tetë në nëntë ndeshjet e fundit të kampionatit. Barcelona-Getafe 6-0 Shënues: Rodriguez 8’ (aut), Munir 19’, Neymar 32’, 51’, Messi 40’, Turan 57’ Barcelona: Bravo, Vidal, Pique (Bartra 68’), Mathieu (Vermaelen 61’), Alba, Turan, Roberto, Iniesta (Iniesta 61’), Messi, Neymar, Munir. Trajner: Enrique. Getafe: Guaita, Buendia, Vergini, Velazquez, Pereira, Wamberto (Mensah 78′), J. Rodriguez, Medran, Leon (Gomez 55’), Yoda, Scepovic (Rodriguez 54’). Trajner: Segura. Gjyqtar: Montero Kartonë të verdhë: Velazquez, Medran, Leon