Pyetja e gazetarit ishte e qartë: “Sinisa, doni të vazhdoni punën me Milan?” Përgjigja gjithashtu: “Si jo? Sigurisht. Ku mund të jetë më mirë se këtu te Milan?” Mihajloviç mbyll në këtë mënyrë zërat që kishin nisur të qarkullonin ditën e hënë, sipas të cilave Sinisa kishte vendosur të linte kuqezinjtë në fund të sezonit, pavarësisht se ka një kontratë deri në vitin 2017.
“Nuk do të ndalem së falënderuar presidentin Berlusconi për mundësinë që më ka dhënë dhe Galliani për besimin që ka tek unë. Jam duke punuar me maksimumin e mundësive të mia dhe do të vazhdoj të punoj me kokën lart. Më vjen keq që humbja e parë pas nëntë ndeshjesh riktheu zërat për largimin tim. Unë i kam dhënë fjalën si burrë dhe si trajner klubit të Milan për një projekt dy vjeçar dhe nuk i lë gjërat për gjysmë. Si trajner mund të më gjykoni, por si burrë askush nuk duhet të më vërë në diskutim,” – deklaroi serbi.
“Pas humbjes ndaj Sassuolo kam kaluar dy natë shumë të vështira, ku kam fjetur shumë pak, – pranoi trajneri Mihajloviç, që më pas shtoi se është i përqendruar vetëm te ndeshja e ardhshme. – Ajo e së dielës ka qenë një humbje që djeg, por nuk do të harrojmë gjërat e mira që kemi bërë deri në atë moment. Mbeten edhe dhjetë javë deri në fund të kampionatit. Vazhdoj të kem besim se do të rikuperojmë pozicione në renditje, edhe pse shoh vetëm në kopshtin poshtë shtëpisë time.”
