Shtëpitë dhe bizneset do të detyrohen që të sigurohen nga dëmet që shkakton natyra. Autoriteti i Mbikëqyrjes Financiare duket se ka avancuar me hartimin e këtij projektligjit, një sigurim i tillë i cili pritet të marrë statusin e sigurimit të detyrueshëm si tek automjetet.
Por, ndërsa të gjitha vendet kanë adoptuar detyrimin për aksidentet me automjete, janë shumë pak ato, që e aplikojnë detyrimin edhe për tërmetet e përmbytjet. Ngritjen e një skeme të posaçme për sigurimin nga tërmetet dhe përmbytjet e ka pranuar edhe kryetari i Bordit të AMF-së, Pajtim Melani.
Kjo vjen pasi Shqipëria konsiderohet si një vend me probabilitet relativisht të lartë të goditjes nga fatkeqësitë natyrore. Ajo renditet ndër vendet me risk të lartë ekonomik ndaj një shumëllojshmërie rreziqesh. Rreth 86% e territorit të saj, ku gjenerohet mbi 88.5% e PBB, është e ekspozuar nga dy a më shumë fatkeqësi natyrore.
(Boldnews)
