Champions League / Benfica kualifikohet në Rusi

Një gol fatlum i shënuar nga Nicolas Gatitan, pesë minuta para fundit, i ka dhënë mundësinë portugezëve të Benfica të shkojnë në çerekfinalen e Champions League, pasi eliminuan Zenit me rezultatin e përgjithshëm 3-1. 90 minutat në Shën Petërsburg u mbyllën 1-2 dhe Benfica vazhdon më tej edhe në saj të fitores 1-0 në ndeshjen e parë, por deri në minutën e 85-të sfida ishte në ekuilibër të plotë.
Pas një pjese të parë të dominuar totalisht, Zenit e nisi vrullshëm edhe pjesën e dytë duke gjetur golin e avantazh, që barazoi sfidën e parë. Në minutën e 69-të, Hulk shënoi me një goditje të saktë me kokë, i lirë brenda zonës së Benfica, pas kromimit të marrë nga Yuri Zhirkov nga e majta.
Të dyja skuadrat nisën të mendojnë për kohën shtesë, por pesë minuta para fundit erdhi goli i Benfica, i lindur nga hiçi. Qendërsulmuesi Raul Jimenez lëshoi një “predhë” nga rreth 30 metra, e cila u devijua nga portieri vendas dhe u përplas në traversë. Për fatin e mirë të miqve topi shkoi në kokën e Nicolas Gatian për të cilin ishte si një lojë fëmijësh shënimi i golit me portën e boshatisur.
Në minutën e gjashtë shtesë, benfica shënoi edhe golin e dytë me anë të Talisca. Benfica, kryesuese dhe kampione në fuqi e Portugalisë (34 tituj gjithsej), e ka fituar dy herë titullin kampion Europe në sezonet 1960-61 dhe 1961-62. Benfica bëhet skuadra e tretë që fiton të drejtën për të qenë mes tetë më të mirave të Europës, pasi të martën në mbrëmje prenë biletën për më tej, Real Madrid dhe Wolfsburg.