Paris Saint-Germain ka fituar 2-1 ndaj Chelsea në Londër
, ashtu si para tre javësh në Francë, duke u kualifikuar për në çerekfinalet e Champions League. Rabiot dhe Ibrahimovic shënuan për skuadrën e Blanc, ndërsa Diego Costa realizoi golin e barazimit të përkohshëm për Chelsea. PSG i bashkohet Real Madrid, Wolfsburg dhe Benfica në listën e skuadrave të kualifikuara deri tani.
Paris SG e nisi më mirë se Chelsea ndeshjen në “Stamford Bridge” dhe gjeti golin e avantazhit kur u mbush gjysmë ore lojë. Zlatan Ibrahimovic dha një top të artë për Adrien Rabiot, për të cilin ishte si një lojë fëmijësh ta shtynte topin në rrjetë me portën e boshatisur, duke i “vjedhur” kohën mbrojtësit Azpilicueta.
Chelsea u zgjua vetëm pas golit të pësuar dhe reagoi në minutën e 27-të, duke shënuar golin e barazimit me një aksion nga linjat e qendrës. Braziliani Willian pasoi saktësisht se Diego Costa, që krijoi hapësirë me një finte ndaj Thiago Silva dhe lëshoi një goditje që kapi në befasi portierin Trapp duke vulosur golin e barazimit.
Në fundin e pjesës së parë, pritjet e portieri Trapp i mohuan golin Diego Costa, ndërsa në minutën e dhjetë të pjesës së dytë, qendërsulmuesi i Chelsea, u largua i dëmtua nga fusha, si pasojë e një tërheqje muskulore. Ishte momenti që Chelsea kishte nevojë për spanjollin, pasi Paris SG po mbrohej me shumë vetë.
Në mesin e pjesës së dytë, “gardiani” i portës së PSG, Kevin Trapp, bëri mrekullinë duke pritur dy goditje në harkun e pak sekondave nga Willian dhe Eden Hazard. Vetëm dy minuta më vonë, Zlatan Ibrahimovic mbylli llogaritë duke shënuar golin e dytë për kampionët e Francës, që përsëritën rezultatin e ndeshjes së parë, duke udhëhequr 2-1.
Sulmuesi suedez u gjend në vendin e duhur në momentin e duhur dhe mposhti portierin Courtois pas pasimit të marrë nga Angel di Maria. Nga ky moment kishin mbetur edhe 20 minuta lojë, por Chelsea kishte nevojë për tre gola që të vazhdonte më tej. Praktikisht ishte e pamundur dhe londinezët u pajtuan me eliminimin.
