Kreu i grupit parlamentar të Partisë Socialiste, Gramoz Ruçi është rikthyer pas në kohë gjatë konventës së grave socialiste ku janë shprëndarë edhe kartat e reja të anëtarësimeve. Duke folur për rolin që PS iu ka dhënë grave, Ruçi nostalgjik është kthyer në termin e preferuar në komunizëm për gratë, duke i quajtur ‘shoqe’
Ai tha se mes kandidateve shoqe dhe burra në Cakran i kishte marrë votat një shoqe dhe se 50% e delegateve janë shoqe. Ai kërkoi që edhe në organizatat socialiste 50 % të jenë gra.
Ai më pas ka treguar një episod nga e kaluara, në kohën që ishte ministër i brendshëm për 3 muaj.
“Para 25 viteve, në ’91-shin unë isha ministër i brendshëm. Situata ishte kritike. Atëherë erdhi një partner nga Gjermania dhe më pyeti si do ta përballosh? Ndërsa unë i flisja për masat policeske ai më tha zotëri ke vetëm një shpresë: Duhet t’u drejtohesh grave në televizor. Mendova ‘ç’është ky i marrë’. I thashë si të dal. Ai më tha se ‘gjakrat janë të ndezura vetëm gratë mund të shpëtojnë këtë vend dhe ty. Vetëm gruaja mund të ulë gjakrat e këtij populli dhe vendi dhe të kapërcejë këtë moment’. Dhe falë grave shpëtova, Shqipëria nuk kaloi në luftë civile as në ‘97 e as në ‘91”, tha Ruçi.
(Boldnews)
