Për kampionatin evropian të peshëngritjes burime zyrtare të federatës konfirmuan për “Panorama Sport” se gjashtë peshëngritës djem dhe dy vajza do të përfaqësojnë ngjyrat kuqezi në këtë Europian, që është garë kualifikuese në Lojërat Olimpike “Rio 2016”.
Me shpresën e kualifikimit në Brazil, kryesia e federatës ka përzgjedhur Romario Avdirajn (pesha 62 kg), Briken Caljën (pesha 69 kg), Erkand Qerimajn (pesha 77 kg), Krenar Shorajn (pesha 85 kg), Sopot Sulën (pesha 94 kg), Endri Karinën (pesha 94 kg) për meshkuj dhe Evangjeli Velin (pesha 53 kg) e Shqiponja Brahjen (pesha 48 kg) për femra.
Ndërkohë, kombëtarja shqiptare do të shoqërohet në këtë Europian (mundësia e fundit për Rion) nga trajnerët Zef Kovaçi dhe Leonard Toska. Gjithashtu, pjesë e delegacionit do të jenë edhe presidenti i Federatës, Elez Gjoza dhe sekretari i përgjithshëm, Agron Haxhihyseni.
Dy titullarët e FSHP-së do të jenë të pranishëm më 7 prill edhe në Kongresin e Federatës Europiane. Sipas federatës, të përzgjedhurit në mbledhjen e djeshme të kryesisë do të vijojnë përgatitjet të grumbulluar në Shtërmen. Kupa e Shqipërisë, e zhvilluar në pallatin e sportit “Asllan Rusi”, shpalli Tiranën me trajner Sokol Bishanaku si fituese të dyfishtë në renditjen ekipore.
Ndërsa si sportistët më të mirë dolën Evangjeli Veli dhe Erkand Qerimaj. Madje, Veli hyri edhe në historinë e shtangës kuqezi në stilin e shkëputjes. Veli theu rekordin e Fetije Kasës, 82 kg e vendosur në Botërorin e të rejave në 2005- ën.
Veli do ta përmirësonte këtë rezultat dy herë gjatë garës së Kupës së Shqipërisë në peshën 53 kg. Fillimisht me provën 83 kg dhe më pas 86 kg. Ndërsa në shtytje Veli do të realizonte peshën 105 kg dhe në dygarësh 191 kg. Nga ana tjetër, shkodrani Qerimaj do të realizonte në peshën 85 kg, 157 kg në shkëputje, 195 kg në shtytje dhe 352 kg në dygarësh.
Lista
Meshkuj
Romario Avdiraj pesha 62 kg
Briken Calja pesha 69 kg
Erkand Qerimaj pesha 77 kg
Krenar Shoraj pesha 85 kg
Sopot Sula pesha 94 kg
Endri Karina pesha 94 kg
Femra
Shqiponja Brahja pesha 48 kg
Evangjeli Veli pesha 53 kg
Trajnerë: Zef Kovaçi, Leonard Toska /Panorama Sport/
