Edhe këtë vit festa e 8-marsit i gjeti gratë dhe vajzat kukësiane në një situatë dramatike përsa i përket aspektit social dhe ekonomik.
Kërkesat janë të ripërsëritura për mundësi dhe shanse të barabarta. Lidhja Demokratike e Grave Shqiptare organizoi sot një takim me gra dhe vajza kuksiane, ku kryetarja Albana Vokshi shpjegoi pse kishte zgjedhur këtë qyteti ndërsa apeloi kundër diskriminimit gjinor.
“Pse zgjodhëm Kukësin sot? E kemi diskutuar edhe me anëtare të tjera të kryesisë së PD. Zgjodhëm Kukësin sepse Rama e ka lënë qëllimisht qarkun më të varfër. Gratë Kuksianë në pjesën më të madhe kanë problematika që i kemi njohur edhe në fushatë që nga mungesa e dritave, ujit por edhe deri aty sa takonim zonja që s’kishin të ardhura as për të blerë ilaçe.” – shprehet Vokshi.
Kryetarja e LDGSH ngriti shqetësimin edhe për eksodin masiv të largimit të qindra kukësianëve për të kërkuark azil në vendet e BE. Këto largime masive kanë patur efekt tek gratë të cilat janë mbyllur në shtëpi për të mbajtur familjen.
“Vetëm vitin e fundit nga Kukësi janë larguar 400 familje që kanë ikur dhe kjo është e tmerrshme. Pra vetëm në një vit mendohet se janë larguar 1200 vetë. Po çfarë është kjo?! Në një farë mënyrë është asimilim, një genocid modern i Ramës”- shtoi më tej Vokshi.
Gratë kuksianë shprehen se nuk kanë asnjë mundësi të punojnë dhe u ka humbur shpresa.
